മഴയാണെങ്കിലും വെയിലാണെങ്കിലും വീട്ടമ്മമാരുടെ ജോലി ഭാരത്തിൽ കുറവുണ്ടാകാറില്ല. എന്നാൽ മഴക്കാലമെത്തുന്നതോടെ വെയിൽ കൊണ്ട് ഉണങ്ങിയെടുക്കാറുള്ള തുണികൾ ഉണക്കിയെടുക്കുക എന്ന ടാസ്‌കുകൾ കൂടി നേരിടേണ്ടതായി വരാറുണ്ട്. അതുകൊണ്ട് തന്നെ ജോലി എളുപ്പമാക്കുന്നതിനൊക്കെയും ചില പൊടിക്കൈകൾ ഇവർ പ്രയോഗിക്കാറുണ്ട്. ഇത്തരത്തിൽ എളുപ്പവഴി കണ്ടെത്തി വേഗം ജോലി പൂർത്തിയാക്കുന്ന വീട്ടമ്മയുടെ വീഡിയോ ആണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്.
രാവിലെ തന്നെ മക്കൾക്ക് പള്ളിയിൽ പോകണം. ഇവർക്കിടാനുള്ള ഡ്രസ് തേക്കുന്നതിനായി കറന്റുമില്ല. ഒന്നും ആലോചിച്ച് നിൽക്കാൻ ഈ വീട്ടമ്മയ്‌ക്ക് സമയമുണ്ടായിരുന്നില്ല. അമ്മ നേരെ ഇസ്തിരിപ്പെട്ടിയുമായി അടുക്കളയിലേയ്‌ക്ക് വിട്ടു. അടുക്കളയിലെത്തി ഗ്യാസ് സ്റ്റൗ ഓൺ ആക്കി. പിന്നെ ഇസ്തിരിപ്പെട്ടി തീയുടെ മുകളിൽ പിടിച്ച് ചൂടാക്കിയെടുത്തു. ചൂടായ ഇസ്തിരിപ്പെട്ടിയെടുത്ത് ചുളിവുകളൊന്നുമില്ലാതെ തുണി തേച്ചെടുത്തു.
ഐസക് ന്യൂട്ടൻ പോലും അന്ധാളിച്ച കണ്ടുപിടിത്തം എന്നായിരുന്നു വീട്ടമ്മയുടെ ഈ ബുദ്ധിയെപ്പറ്റി വീഡിയോയിൽ പറഞ്ഞിരിക്കുന്നത്. സമർത്ഥയായ വീട്ടമ്മയെന്നും, ഇസ്തിരിപ്പെട്ടിയുടെ വയർ കരിയാഞ്ഞത് ഭാഗ്യം എന്നൊക്കെ വീഡിയോയുടെ ബാക്ക്ഗ്രൗണ്ടിൽ പറയുന്നത് കേൾക്കാം. എന്തായാലും പെട്ടെന്നാരും ചിന്തിക്കാത്ത ഈ വഴി സമൂഹമാദ്ധ്യമങ്ങളിൽ വൈറലായത് വളരെപ്പെട്ടെന്നായിരുന്നു.
സമൂഹമാദ്ധ്യമങ്ങളിൽ പങ്കുവെച്ച ഈ വീഡിയ മൂന്ന് ദിവസം കൊണ്ട് മുപ്പത് ലക്ഷത്തിലധികം ആളുകളാണ് കണ്ടുകഴിഞ്ഞിരിക്കുന്നത്. വൈദ്യുതി ഇല്ലേ…എങ്കിൽ വിഷമിക്കണ്ട. എന്ന് കരുതി ഇപ്പോൾതന്നെ ഇത് പരീക്ഷിച്ചേക്കാമെന്ന് കരുതണ്ട. സൂക്ഷിച്ചില്ലെങ്കിൽ പണി കിട്ടുമെന്ന് ഉറപ്പ് എന്ന അടിക്കുറിപ്പോട് കൂടിയായിരുന്നു വീഡിയോ പങ്കുവെച്ചത്.
