ധരിച്ച വസ്ത്രങ്ങൾ വീണ്ടുമണിയാൻ പൊതുവെ സെലിബ്രിറ്റികൾക്ക് മടിയാണ്. ഏതെങ്കിലും ചടങ്ങിന് ധരിച്ച വസ്ത്രങ്ങൾ അവർ മറ്റൊരു പരിപാടിക്ക് വേണ്ടി ഉപയോഗിക്കാറില്ല. ആദ്യത്തെ തവണ ധരിക്കുമ്പോൾ തന്നെ അതിന്റെ ഫോട്ടോകളും വീഡിയോകളും സോഷ്യൽ മീഡിയയിൽ വരുന്നതിനാൽ എല്ലാവരും കാണുന്നു എന്നുള്ളതാണ് ഇതിനൊരു കാരണം. എന്നാൽ ഒരിക്കൽ ധരിച്ച വസ്ത്രങ്ങൾ വീണ്ടുമണിയാൻ മടി കാണിക്കാത്ത അപൂർവ്വം സെലിബ്രിറ്റികളിൽ ഒരാളാണ് നടി ആലിയ ഭട്ട്.
ഒരു വർഷം മുമ്പ് വിവാഹവുമായി ബന്ധപ്പെട്ട ചടങ്ങുകൾക്ക് ആലിയ ധരിച്ചിരുന്ന ഒരു ഓറഞ്ച് അനാർക്കലി ചുരിദാറാണ് താരമിപ്പോൾ വീണ്ടുമണിഞ്ഞത്. ‘റോക്കി ഓർ റാണി കി പ്രേം കഹാനി’ എന്ന ചിത്രിത്തിന്റെ ട്രെയിലർ പ്രിവ്യൂ നടത്തുന്ന ചടങ്ങിന് എത്തിയപ്പോഴാണ് ആലിയ തന്റെ വിവാഹ കളക്ഷനിലുണ്ടായിരുന്ന ഓറഞ്ച് അനാർക്കലി വീണ്ടും ധരിച്ചത്.
നൂഡിൽ സ്‌ട്രേപ്‌സ് ഉള്ള കോട്ടൺ-സിൽക്ക് അനാർക്കലിയാണിത്. നെക്ക് ലൈനിൽ എംബ്രോയ്ഡറി വർക്കും ഇതിന് വരുന്നുണ്ട്. ഓർഗൻസ ദുപ്പട്ടയും നിറയെ എംബ്രോയ്ഡറി വർക്കുള്ള പലാസയുമാണ് ഒപ്പമുള്ളത്. വിവാഹത്തിന് മുമ്പ് രൺബീറിനൊപ്പം പങ്കെടുത്ത ഒരു പൂജാ ചടങ്ങിന്റെ സമയത്തായിരുന്നു താരം ഇതേ വേഷം നേരത്തെ ധരിച്ചിരുന്നത്.
അതിമനോഹരമായ ഓറഞ്ച് അനാർക്കലി സ്വന്തമാക്കണമെന്നാഗ്രഹിക്കുന്നവർ ദേവനാഗിരി വെബ്‌സൈറ്റ് സന്ദർശിക്കാമെന്ന് ആരാധകർ കണ്ടെത്തിയിട്ടുണ്ട്. വെബ്‌സൈറ്റിൽ ആലിയയുടെ വേഷത്തിന് 24,500 രൂപയാണ് നിരക്ക് കാണിക്കുന്നത്.
