ഒറ്റ ചിത്രം കൊണ്ട് മലയാളികളുടെ പ്രിയങ്കരിയായ നടിയാണ് പ്രീതി ജാംഗിയാനി. പ്രീതി ആദ്യമായി അഭിനയ രംഗത്തേക്ക് കടന്നു വരുന്നത് നടൻ അബ്ബാസിനോടൊപ്പം ഒരു സംഗീത ആൽബത്തിൽ അഭിനയിച്ചു കൊണ്ടാണ്. ദിനേശ് ബാബു സംവിധാനം ചെയ്ത് 1999-ൽ പുറത്തിറങ്ങിയ “മഴവില്ല് ” എന്ന ചിത്രത്തിലാണ് നടി അഭിനയിച്ചത്. ചലച്ചിത്രരംഗത്ത് നടി അരങ്ങേറ്റം കുറിക്കുന്നതും മഴവില്ലിലൂടെയാണ്. കുഞ്ചാക്കോ ബോബനായിരുന്നു ചിത്രത്തിൽ നായകനായി എത്തിയത്.
വിനീത് , ലാലു അലക്സ് , പ്രവീണ, ചിത്ര, കോട്ടയം നസീർ എന്നിവരായിരുന്നു മഴവില്ലിലെ പ്രധാന കഥാപാത്രങ്ങൾ. ഗാനരചന കൈതപ്രം, സംഗീതസംവിധാനം മോഹൻ സിത്താര എന്നിവർ നിർവഹിച്ചു. ചിത്രത്തിലെ ഗാനങ്ങളെല്ലാം വമ്പൻ ഹിറ്റായിരുന്നു. ഇന്നും സിനിമയിലെ ഗാനങ്ങൾ മലയാളികളുടെ പ്രിയപ്പെട്ടതാണ്. ദിനേശ് ബാബുവിന്റെ കന്നഡ ചിത്രമായ അമൃത വർഷിനിയുടെ പുനരാവിഷ്കരണമായിരുന്നു മഴവില്ല്. സംവിധായകന്റെ കഥയ്ക്കും തിരക്കഥയ്ക്കും ജെ. പള്ളാശ്ശേരിയാണ് സംഭാഷണം രചിച്ചത്. ദിനേശ് ബാബു തന്നെയാണ് ഛായാഗ്രഹണവും നിർവ്വഹിച്ചിരിക്കുന്നത്.
2000-ലാണ് പ്രീതി ജാംഗിയാനി ബോളിവുഡിൽ ആദ്യമായി അഭിനയിക്കുന്നത്. മൊഹബത്തേൻ എന്ന ചിത്രത്തിലെ അഭിനയം പ്രീതിയെ ബോളിവുഡിൽ ശ്രദ്ധേയയാക്കി. ഇതിൽ ഷാരൂഖ് ഖാൻ, അമിതാഭ് ബച്ചൻ ഐശ്വര്യ റായ് എന്നീ വൻ താരങ്ങളും അഭിനയിച്ചിരുന്നു. പിന്നീട് ഹാസ്യ ചിത്രമായ ആവാര പാഗൽ ദീവാന എന്ന ചിത്രത്തിൽ അഭിനയിച്ചു. 2008 മാർച്ച് 23 നായിരുന്നു നടനായ പർവീൺ ഡബാസിനെ പ്രീതി വിവാഹം ചെയ്തത്. പിന്നീട് നടി അഭിനയത്തിൽ നിന്നും വിട്ടു നിന്നു. ഇവർ മുംബൈയിലെ ബാന്ദ്രയിലാണ് താമസം.
ഇപ്പോഴിതാ സോണി ലൈവിലെ കഫാസ് എന്ന പരമ്പരയിലൂടെ പ്രീതി ജാംഗിയാനി വീണ്ടും സ്ക്രീനിൽ എത്തുകയാണ്. തിരിച്ചുവരവുമായി ബന്ധപ്പെട്ട വിവരങ്ങൾ ഉടൻ എത്തുമെന്നാണ് റിപ്പോർട്ട്. നടി ഹിന്ദി മ്യൂസിക് വീഡിയോയിൽ അഭിനയിച്ചിരുന്നു. ചുയി മുയി സി തും എന്ന് പേരിട്ടിരിക്കുന്ന വീഡിയോ ട്വിറ്ററിൽ ഇപ്പോൾ വീണ്ടും പ്രത്യക്ഷപ്പെട്ടിരിക്കുകയാണ്. ഒരു മാദ്ധ്യമപ്രവർത്തകനാണ് ട്വിറ്ററിൽ വീഡിയോ പങ്കുവെച്ചത്.
ഇതോടെ പ്രീതി വീണ്ടും വാർത്തകളിൽ നിറഞ്ഞു. രാജശ്രീ മ്യൂസിക് ആൽബമായ യേ ഹേ പ്രേം (1997) എന്ന ഗാനത്തിലൂടെ 17 വയസുകാരിയായ പ്രീതി എങ്ങനെയാണ് ഒറ്റരാത്രികൊണ്ട് താരമായതെന്ന് മനസിലാക്കുന്നു. എന്നായിരുന്നു ട്വീറ്റ്. വീണ്ടും പഴയ റൊമാന്റിക് വീഡിയോ കണ്ടെത്തിയതിന്റെ സന്തോഷത്തിലാണ് ആരാധകർ. “അയ്യോ ഞാൻ ഇത് മറന്നു പോയിരുന്നു. ആ ഓർമ്മകൾ പുതുക്കിയതിന് നന്ദി. ഈ പാട്ടും ഈ മ്യൂസിക് വീഡിയോയും എന്തൊരു ഭംഗിയാണ്.. എന്നൊക്കെയാണ് ആരാധകർ പറയുന്നത്.
Comments