ഓസ്ട്രേലിയൻ ഗ്രാന്റ് പ്രീക്ക് പിന്നാലെ ബ്രിട്ടീഷ് ഗ്രാന്റ് പ്രീയിലും വെന്നിക്കൊടി പാറിച്ച് റെഡ് ബുള്ളിന്റെ ഡച്ച് ഡ്രൈവർ മാക്സ് വെർസ്റ്റപ്പൻ.സീസണിൽ ഡച്ച് ഡ്രൈവർ നേടുന്ന തുടർച്ചയായ ആറാം റേസ് ജയവും കരിയറിലെ 43ാം റേസ് ജയവുമാണ്. ബ്രിട്ടീഷ് ഗ്രാന്റ് പ്രീയിൽ ജയം ഇല്ല എന്ന പതിവും ഇത്തവണ വെർസ്റ്റപ്പൻ തിരുത്തി.
പോൾ പൊസിഷനിൽ റേസ് തുടങ്ങിയ വെർസ്റ്റപ്പനു ഇടക്ക് മക്ലാരന്റെ ലാന്റോ നോറിസ് വെല്ലുവിളി ഉയർത്തി എങ്കിലും ഡച്ച് ഡ്രൈവർ പിന്നീട് മുൻതൂക്കം തിരിച്ചു പിടിച്ചു. റെഡ്ബുള്ളിന്റെ തുടർച്ചയായ 11ാം വിജയമാണിത്. 1988ൽ മക്ലാരൻ നേടിയ റെക്കോർഡിനൊപ്പമെത്തി. ലോകചാമ്പ്യൻ ഷിപ്പിൽ എതിരാളിയെക്കാൾ 99 പോയിന്റുകൾ മുന്നിലാണ് വെർസ്റ്റപ്പൻ
നിലവിൽ ലോക ചാമ്പ്യൻഷിപ്പിന് ആയുള്ള പോരാട്ടത്തിൽ ഒരാൾ പോലും വെർസ്റ്റപ്പനു അടുത്ത് പോലുമില്ല. മക്ലാരന്റെ ബ്രിട്ടീഷ് ഡ്രൈവർ ലാന്റോ നോറിസ് രണ്ടാമത് എത്തിയപ്പോൾ മുൻ ലോക ചാമ്പ്യനും ബ്രിട്ടീഷ് ഡ്രൈവറും ആയ മെഴ്സിഡസിന്റെ ലൂയിസ് ഹാമിൾട്ടൻ മൂന്നാമത് എത്തി. മക്ലാരന്റെ ഓസ്കാർ പിയാസ്ട്രി നാലാമത് എത്തിയപ്പോൾ മറ്റൊരു ബ്രിട്ടീഷ് ഡ്രൈവർ ആയ മെഴ്സിഡസിന്റെ ജോർജ് റസൽ അഞ്ചാം സ്ഥാനത്ത് എത്തി.
