ചെന്നൈ: ക്രിക്കറ്റിൽ നിന്ന് വിരമിച്ചിട്ടും ആരാധകരുടെ മനസിൽ ഇന്നും മുന്നിലാണ് മഹേന്ദ്ര സിംഗ് ധോണി. ഇന്ത്യയൊട്ടാകെ അദ്ദേഹത്തിന്റെ മത്സരങ്ങൾ കാണുന്നതിനായി ആരാധകർ ധാരാളം എത്താറുണ്ട്. ചെന്നൈ സൂപ്പർ കിംഗ്സിന്റെ ക്യാപ്റ്റൻ എന്ന നിലയിലാണ് അദ്ദേഹത്തിന് ഇത്രമാത്രം ആരാധകരുണ്ടാകാൻ കാരണം. കഴിഞ്ഞ ദിവസം ചെന്നൈ വിമാനത്താവളത്തിൽ ഇറങ്ങിയ താരത്തെ കാത്തിരുന്നത് ആരാധകരുടെ വൻ നിരയായിരുന്നു. ഇതിനിടെ ആരാധകന്റെ ചോദ്യവും ധോണിയുടെ പ്രതികരണവുമാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധേയമാകുന്നത്.
കരിയറിലെ പുതിയൊരു സംരംഭത്തിന് വേണ്ടിയായിരുന്നു താരം ചെന്നൈയിൽ എത്തിയത്. ധോണി എന്റർടെയ്ൻമെന്റ് പ്രൈവറ്റ് ലിമിറ്റഡ് എന്ന കമ്പനി പുതിയൊരു തമിഴ് സിനിമ നിർമ്മിക്കുന്നുണ്ട്. എൽജിഎം എന്നാണ് ഈ ചിത്രത്തിന് പേര് നൽകിയിരിക്കുന്നത്. ഭാര്യ സാക്ഷിയ്ക്കൊപ്പം ഈ സിനിമയുടെ ലോഞ്ചിംഗിന് വേണ്ടിയാണ് ഇരുവരും ചെന്നൈയിൽ എത്തിയത്. ഇതിനായി വിമാനത്താവളത്തിൽ എത്തിയപ്പോഴായിരുന്നു ആരാധകർ വളഞ്ഞത്. ഈ സമയമായിരുന്നു ആരാധകന്റെ ചോദ്യം. ധോണിയുടെ കാലിന് പരിക്ക് പറ്റിയിരുന്നു. ഇതിനെക്കുറിച്ചായിരുന്നു ആരാധകന്റെ ചോദ്യം.
മഹിഭായ് മുട്ടുകാലിന്റെ പരിക്ക് എങ്ങനെയുണ്ട് എന്നായിരുന്നു ആരാധകൻ ധോണിയോട് ചോദിച്ചത്. എന്നാൽ വിമാനത്താവളത്തിലെ തിരക്കിനിടെ താരം ഇത് കേട്ടില്ല. എന്നാൽ ആരാധകനെ നോക്കി കൈവീശി കാണിച്ച് ധോണി പുറത്തേക്ക് നീങ്ങി. ഇതാണ് ഇപ്പോൾ വൈറലായിരിക്കുന്നത്. ധോണിയ്ക്ക് കുറച്ച് നാളുകളായി പരിക്ക് ഉണ്ടായിരുന്നു. താരം ഐപിഎല്ലിൽ കളിച്ചതും ഈ പരിക്ക് വെച്ചാണ്.
