ഐശ്വര്യ രജനീകാന്ത് സംവിധാനം ചെയ്യുന്ന ഏറ്റവും പുതിയ ചിത്രമാണ് ‘ലാൽ സലാം’. ചിത്രത്തിൽ ഒരു പ്രധാനവേഷത്തിൽ രജനീകാന്തും എത്തും. ചിത്രത്തിൽ അതിഥി വേഷത്തിലാകും താരം എത്തുക. ഇപ്പോഴിതാ ചിത്രത്തിലെ രജനികാന്തിന്റെ ഭാഗം പൂർത്തിയായെന്നാണ് പുറത്തു വരുന്ന വാർത്ത.
ലാൽ സലാമിന്റെ നിർമാതാക്കളായ ലൈക്ക പ്രൊഡക്ഷൻസ് ആണ് ഇക്കാര്യം അറിയിച്ചിരിക്കുന്നത്. കൂടാതെ സിനിമയുടെ അണിയറ പ്രവർത്തകർക്കൊപ്പമുള്ള രജനികാന്തിന്റെ ചിത്രവും പങ്കുവെച്ചിട്ടുണ്ട്. ചിത്രത്തിൽ ‘മൊയ്തീൻ ഭായ്’ എന്നാണ് രജനികാന്ത് അവതരിപ്പിക്കുന്ന കഥാപാത്രത്തിന്റെ പേര്. കഥാപാത്രത്തിന്റെ പോസ്റ്റർ നേരത്തെ തന്നെ അണിയറ പ്രവർത്തകർ പുറത്തുവിട്ടിരുന്നു.
മുംബൈയിലെ എല്ലാവരുടെയും പ്രിയപ്പെട്ട ഭായി മൊയ്തീൻ ഭായി എത്തുന്നു എന്നാണ് പോസ്റ്ററിന്റെ ക്യാപ്ഷൻ. സിനിമയിൽ വിഷ്ണു വിശാലും വിക്രാന്തുമാണ് പ്രധാന കഥാപാത്രങ്ങളാകുന്നത്. ധനുഷ് നായകനായ ത്രി, വെയ് രാജ വെയ് എന്നീ സിനിമകളാണ് ഐശ്വര്യ രജനികാന്ത് നേരത്തെ സംവിധാനം ചെയ്തിട്ടുള്ളത്. അതേസമയം ജയിലറാണ് രജനികാന്തിന്റേതായി പുറത്തുവരാൻ ഒരുങ്ങുന്ന ചിത്രം.
