എറണാകുളം: അങ്കമാലി എംഎജിജെ ആശുപത്രിയിൽ യുവതി കുത്തേറ്റു മരിച്ചു. രോഗിയ്ക്ക് കൂട്ടിരിക്കാൻ വന്ന യുവതിയെയാണ് മുൻ സുഹൃത്ത് കൊലപ്പെടുത്തിയത്. മുക്കന്നൂരിലെ ആശുപത്രിയിലെ നാലാം നിലയിൽ രോഗിയ്ക്ക് കൂട്ടിരിക്കുകയായിരുന്ന ലിജി (40) എന്ന യുവതിയെയാണ് മുൻ സുഹൃത്ത് മഹേഷ് കുത്തികൊലപ്പെടുത്തിയത്. പ്രതി മഹേഷിനെ പോലീസ് കസ്റ്റഡിയിലെടുത്തു.
ലിജിയെ കാണാൻ ആശുപത്രിയിൽ എത്തിയ മഹേഷ് യുവതിയുമായി വാക്കുതർക്കത്തിൽ ഏർപ്പെടുകയും പിന്നീട് കുത്തുകയുമായിരുന്നു. ഓടി രക്ഷപ്പെടാൻ ശ്രമിച്ച ലിജിയെ പിന്നാലെയെത്തി നിരവധി തവണ മഹേഷ് കുത്തുകയായിരുന്നെന്ന് ദൃക്സാക്ഷികൾ പറഞ്ഞു.
ലിജിയുടെ നിലവിളി കേട്ട് ഓടിയെത്തിയ ജീവനക്കാർ മഹേഷിനെ തടയാൻ ശ്രമിച്ചെങ്കിലും അവർക്ക് നേരെയും പ്രതി കത്തിവീശി. സെക്യൂരിറ്റിയുടെയും ആശുപത്രിയിലുണ്ടായിരുന്ന മറ്റ് ആളുകളുടേയും സഹായത്തോടെയാണ് പോലീസ് പ്രതിയെ പിടികൂടിയത്.
