ഗോകുൽ സുരേഷ്, അജു വർഗീസ്, അനാർക്കലി മരക്കാർ, കെ ബി ഗണേഷ് കുമാർ എന്നിവർ കേന്ദ്ര കഥാപാത്രങ്ങളായി എത്തുന്ന ഗഗനചാരി എന്ന ചിത്രത്തിന്റെ ട്രെയിലർ പുറത്തിറങ്ങി. അരുൺ ചന്ദുവിന്റെ സംവിധാനത്തിൽ ഒരുങ്ങുന്ന ചിത്രമാണ് ഗഗനചാരി. സയൻസ് ഫിക്ഷൻ കോമഡി ഗണത്തിൽ ഉൾപ്പെടുന്ന ഈ ചിത്രം പ്രേക്ഷകരിൽ വളരെയധികം കൗതുകമുണർത്തുന്ന തരത്തിലുള്ളതാണെന്നാണ് പുറത്തുവരുന്ന റിപ്പോർട്ട്. 2.04 മിനിറ്റ് ദൈർഘ്യമുള്ള ട്രെയ്‌ലറാണ് ചിത്രത്തിന്റെ അണിയറപ്രവർത്തകർ പുറത്തുവിട്ടിരിക്കുന്നത്. സാജൻ ബേക്കറി എന്ന ചിത്രത്തിന് ശേഷം അരുൺ ചന്ദു സംവിധാനം ചെയ്യുന്ന ചിത്രമാണ് ഗഗനചാരി.
മോക്കുമെന്ററി ശൈലിയിലാണ് ചിത്രം ഒരുക്കിയിരിക്കുന്നതെന്ന് അണിയറ പ്രവർത്തകർ പറയുന്നു. അജിത്ത് വിനായക ഫിലിംസ് ആണ് ചിത്രം നിർമ്മിച്ചിരിക്കുന്നത്. ശിവ സായി, അരുൺ ചന്ദു എന്നിവർ ചേർന്നാണ് ഗഗനചാരിയുടെ രചന നിർവ്വഹിച്ചിരിക്കുന്നത്. ഛായാഗ്രഹണം സുർജിത്ത് എസ് പൈ. സംഗീതം: പ്രശാന്ത് പിള്ള, കലാസംവിധാനം: എം ബാവ, എഡിറ്റിംഗ്: അരവിന്ദ് മന്മഥൻ, സീജേ അച്ചു. കള എന്ന സിനിമയ്‌ക്ക് ചടുലമായ ആക്ഷൻ രംഗങ്ങൾ ഒരുക്കിയ ഫിനിക്‌സ് പ്രഭു ആണ് ചിത്രത്തിന്റെ ആക്ഷൻ ഡയറക്ടർ. വിഎഫ്എക്‌സിന് പ്രാധാന്യമുള്ള ചിത്രത്തിന് ഗ്രാഫിക്‌സ് ഒരുക്കുന്നത് മെറാക്കി സ്റ്റുഡിയോസ് ആണ്.എ.എസ് ദിനേശ്, ആതിര ദിൽജിത്ത് എന്നിവരാണ് ചിത്രത്തിന്റെ പിആർഒ. ലോക്ഡൗൺ കാലഘട്ടത്തിലാണ് സിനിമയുടെ ചിത്രീകരണം നടക്കുന്നത്. കൊറോണ മാനദണ്ഡങ്ങൾ പൂർണ്ണമായും പാലിച്ചുകൊണ്ട് കൊച്ചിയിലായിരുന്നു ഈ പരീക്ഷണ ചലച്ചിത്രം ചിത്രീകരിച്ചത്.
അതേസമയം പുറത്തെത്താനിരിക്കുന്ന ദുൽഖർ സൽമാൻ ചിത്രം കിംഗ് ഓഫ് കൊത്തയിലും ഗോകുൽ സുരേഷ് പ്രധാനകഥാപാത്രത്തെ അവതരിപ്പിക്കുന്നുണ്ട്.ജോഷിയുടെ മകൻ അഭിലാഷ് ജോഷിയുടെ സംവിധാന അരങ്ങേറ്റം കൂടിയാണ് കിംഗ് ഓഫ് കൊത്ത. എതിരെ, അമ്പലമുക്കിലെ വിശേഷങ്ങൾ എന്നിവയാണ് ഗോകുലിന്റേതായി പുറത്തിറങ്ങാനുള്ള മറ്റ് ചിത്രങ്ങൾ.
