2023 വിംബിൾഡൺ ടെന്നീസ് പുരുഷ ഫൈനൽ ഇന്ന് ചരിത്ര പോരാട്ടത്തിന് സാക്ഷ്യം വഹിക്കും. നിലവിലെ ചാമ്പ്യനായ സെർബിയയുടെ നൊവാക് ജോക്കോവിച്ച് ലോക ഒന്നാം നമ്പർ താരമായ സ്പെയിനിന്റെ കാർലോസ് അൽകാരസിനെ ഫൈനലിൽ നേരിടും. ഇന്ന് ഇന്ത്യൻ സമയം വൈകിട്ട് ആറരയ്‌ക്ക് സെന്റർ കോർട്ടിലാണ് മത്സരം.
വിംബിൾഡണിലെ ആദ്യ കിരീടം, രണ്ടാം ഗ്രാൻഡ്സ്ലാം ലക്ഷ്യമിട്ടാണ് ഒന്നാം സീഡ് സ്പാനിഷുകാരൻ കാർലോസ് അൽകരാസ് ഇന്ന് ഫൈനലിനിറങ്ങുന്നത്. രണ്ടാം ഗ്രാൻഡ്സ്ലാം നേട്ടത്തോടെ പുരുഷ ടെന്നീസിലെ അധികാര കൈമാറ്റമാണ് അൽകരാസ് ഉന്നം വയ്‌ക്കുന്നത്. യുഎസ് ഓപ്പണിലൂടെ അൽകാരസ് കന്നി കിരീടം നേടിയിരുന്നു.
സെർബിയൻ താരം നൊവാക് ജോക്കോവിച്ച് 35-ാം ഗ്രാൻഡ്സ്ലാം ഫൈനലിനാണ് ഇറങ്ങുന്നത്. ആദ്യമായാണ് ഒരു ടെന്നീസ് താരം ഇത്രയും മത്സരങ്ങളുടെ ഫൈനലിലെത്തുന്നത്. ഇന്ന് 24-ാം ഗ്രാൻഡ്സ്ലാം കിരീടമാണ് ജോക്കോവിച്ചിന്റെ ലക്ഷ്യം.
