എഐ സാങ്കേതിക വിദ്യ ഉപയോഗിച്ച് സൃഷ്ടിക്കുന്ന ചിത്രങ്ങളും വീഡിയോകളുമെല്ലാം തന്നെ സമൂഹമാദ്ധ്യമങ്ങളിൽ വൈറൽ ആണ്. ഹോളിവുഡ് ക്ലാസിക് ചിത്രം ഗോഡ്ഫാദറിന്റെ മോളിവുഡ് പതിപ്പ് എന്ന പേരിൽ പുറത്തു വന്ന വീഡിയോ ആയിരുന്നു ഡീപ്പ് ഫേക്ക് വീഡിയോകളിൽ ഏറ്റവും അധികം മലയാളികൾക്കിടയിൽ പ്രചരിച്ച വീഡിയോ. ഇപ്പോഴിതാ മറ്റൊരു ഷോട്ട് വീഡിയോ ആണ് സമൂഹമാദ്ധ്യമങ്ങളിൽ തരംഗമായി മാറിയിരിക്കുന്നത്. ഹിസ് ഹൈനസ് അബ്ദുള്ള എന്ന ചിത്രത്തിലെ ഒരു ഗാനം മോഹൻലാൽ ടിക് ടോക് വീഡിയോയിലൂടെ പാടി അഭിനയിച്ചിരുന്നെങ്കിൽ എന്ന ആശയത്തിൽ നിന്ന് രൂപപ്പെട്ട വീഡിയോ ആണ് സമൂഹമാദ്ധ്യമങ്ങളിൽ ശ്രദ്ധേയമായിരിക്കുന്നത്.
ശബരീഷ് രവി എന്നയാളുടെ അക്കൗണ്ടിലാണ് വീഡിയോ പ്രത്യക്ഷപ്പെട്ടിരിക്കുന്നത്. 15 സെക്കൻഡ് മാത്രമാണ് വീഡിയോയുടെ ദൈർഘ്യം എങ്കിലും പെട്ടെന്ന് തന്നെ ഏവരുടെയും ശ്രദ്ധ പിടിച്ചു പറ്റുന്ന തരത്തിലാണ് വീഡിയോ ഉള്ളത്. ഇതിനോടകം തന്നെ വീഡിയോ വൈറലായിക്കഴിഞ്ഞു. സിനിമാ മേഖലയിൽ നിന്ന് ഉൾപ്പെടെയുള്ളവരാണ് വീഡിയോയ്ക്ക് താഴെ കമന്റുകളുമായി എത്തിയിരിക്കുന്നത്.
എന്നാൽ ഇതേ സമയം തന്നെ എഐ സാങ്കേതിക വിദ്യയുടെ പുരോഗതി കലാരംഗത്ത് ആശങ്കകളും സൃഷ്ടിക്കുന്നുണ്ട്.ഏത് തരത്തിലുള്ള വീഡിയോയും മറ്റൊരാളുടെ അനുവാദമില്ലാതെ തന്നെ സൃഷ്ടിക്കാമെന്നത് പ്രധാനവെല്ലുവിളിയായി മാറിയിട്ടുണ്ട്.
ഗോഡ്ഫാദർ സിനിമയുടെ മോളിവുഡ് വേർഷൻ ഒരുക്കിയ വ്യക്തി ഇനി ഇത്തരം വീഡിയോകൾ താൻ സൃഷ്ടിക്കില്ലെന്ന് മുൻപ് പറഞ്ഞിരുന്നു.
