മുംബൈ : നടൻ റിതേഷ് ദേശ്മുഖും അദ്ദേഹത്തിന്റെ ഭാര്യയും നടിയുമായ ജെനീലിയ ഡിസൂസ ദേശ്മുഖും സിനിമാ മേഖലയിലെ ഏറ്റവും ക്യൂട്ട് ദമ്പതികളായി കണക്കാക്കപ്പെടുന്നു. മറാത്തി ചിത്രമായ ‘വേഡ്’ എന്ന ചിത്രത്തിലാണ് ഇരുവരും അവസാനമായി ഒന്നിച്ചത് . ഇതുവരെ ഹിന്ദി, തമിഴ്, തെലുങ്ക്, കന്നഡ, മലയാളം എന്നിങ്ങനെ വിവിധ ഭാഷകളിലെ സിനിമകളിൽ ജെനീലിയ അഭിനയിച്ചിട്ടുണ്ട്. ഇപ്പോഴിതാ റിതേഷിന്റെ വരാനിരിക്കുന്ന ഛത്രപതി ശിവാജി മഹാരാജയെ കുറിച്ചുള്ള ചിത്രത്തെ കുറിച്ചാണ് ജെനീലിയ മാദ്ധ്യമങ്ങളോട് വ്യക്തമാക്കിയത് .
നിലവിൽ മറാത്തി ചലച്ചിത്രമേഖലയിൽ ചരിത്ര സിനിമകൾ നിർമ്മിക്കുന്ന പ്രവണതയുണ്ട്. നിരവധി സംവിധായകരും നിർമ്മാതാക്കളും ഛത്രപതി ശിവാജി മഹാരാജിന്റെ ജീവിതം സിനിമയാക്കുന്നുമുണ്ട്. ഛത്രപതി ശിവാജി മഹാരാജിന്റെ ജീവിതത്തെ ആസ്പദമാക്കി ഒരു സിനിമ നിർമ്മിക്കുമെന്ന് റിതേഷ് ദേശ്മുഖും ദിവസങ്ങൾക്ക് മുമ്പ് പ്രഖ്യാപിച്ചിരുന്നു. 2020ൽ റിതേഷ് ദേശ്മുഖ് ഇക്കാര്യം പറഞ്ഞിരുന്നു. ഇപ്പോഴിതാ ജെനീലിയ ഡിസൂസയും ഇക്കാര്യം സ്ഥിരീകരിച്ചു.
ഈ ചിത്രത്തിന്റെ പണിപ്പുരയിലാണ് തങ്ങളെന്നാണ് അടുത്തിടെ ഒരു അഭിമുഖത്തിൽ ജെനീലിയ വെളിപ്പെടുത്തിയത് . എന്നാൽ ഇതിന് വളരെയധികം സമയമെടുക്കുമെന്നും അവർ പറഞ്ഞു. റിതേഷ് ദേശ്മുഖിന്റെ ഹൃദയത്തോട് വളരെ അടുത്താണ് ഈ സിനിമയെന്നും ജെനീലിയ പറഞ്ഞു. ഈ ഒരു ചിത്രത്തിന് വേണ്ടി ജീവിതം സമർപ്പിക്കാൻ പോലും തയ്യാറാണ്. . തങ്ങളുടെ പ്രൊഡക്ഷൻ ഹൗസായ ‘മുംബൈ ഫിലിം കമ്പനി’യുടെ ബാനറിലാണ് ചിത്രം നിർമ്മിക്കുന്നതെന്നും ജെനീലിയ പറഞ്ഞു .അജയ് അതുലാണ് ഈ ചിത്രത്തിന് സംഗീതം നൽകുക. റിതേഷ് തന്നെ ചിത്രത്തിൽ ശിവാജി മഹാരാജ് ആയി എത്തുമെന്നാണ് റിപ്പോർട്ട് .
നിലവിൽ ശിവാജി മഹാരാജിന്റെ ജീവിതത്തെ ആസ്പദമാക്കി നിരവധി സിനിമകൾ വരുന്നുണ്ട്. മഹേഷ് മഞ്ജരേക്കർ സംവിധാനം ചെയ്യുന്ന ‘വേദത് മറാത്തേ വീർ ദൗഡിൽ സാത്’ എന്ന ചിത്രത്തെ പ്രേക്ഷകർ ഏറെ ആകാംക്ഷയോടെയാണ് കാത്തിരിക്കുന്നത്. അക്ഷയ് കുമാറാണ് ഇതിൽ പ്രധാന വേഷത്തിൽ എത്തുന്നത്.
