മാഞ്ചെസ്റ്റര്‍: ഓള്‍ഡ് ട്രാഫോര്‍ഡില്‍ പെയ്തിറങ്ങിയ കനത്ത മഴയ്‌ക്കൊപ്പം ലയിച്ച് ഇംഗ്ലണ്ടിന്റെ ആഷസ് സ്വപ്‌നങ്ങള്‍. ചിരവൈരികളില്‍ നിന്ന് കിരീടം തിരിച്ചുപിടിക്കാനുറച്ച് നാലാം ടെസ്റ്റിനിറങ്ങിയ ഇംഗ്ലണ്ടിന് ഓസ്‌ട്രേലിയ്‌ക്കൊപ്പം മഴയെയും മറികടക്കേണ്ടിവന്നതോടെയാണ് കിരീട മോഹങ്ങള്‍ പൊലിഞ്ഞത്. 275 റണ്‍സിന്റെ ഒന്നാം ഇന്നിംഗ്സ് ലീഡിന്റെ ഉറപ്പില്‍ വന്‍ വിജയത്തിലേക്ക് നീങ്ങുന്നതിനിടെയാണ് ഇംഗ്ലണ്ടിന്റെ ഹൃദയം പിളര്‍ത്തി മഴയെത്തിയത്. അഞ്ച് ദിവസമുളള ടെസ്റ്റില്‍ ഏതാണ്ട് രണ്ടര ദിവസത്തിലേറെ മഴ കവര്‍ന്നെടുത്തതോടെ ഇംഗ്ലീഷ് ക്യാമ്പ് മരണവീടിന് സമാനമായി.
അഞ്ചാംദിവസം ഒറ്റപ്പന്തുപോലും എറിയാന്‍ കഴിയാതായതോടെ മത്സരം സമനിലയിലായി. ഇതോടെ ഓസ്‌ട്രേലിയ ആഷസ് ക്രിക്കറ്റ് കിരീടം നിലനിര്‍ത്തുകയായിരുന്നു. സ്‌കോര്‍: ഇംഗ്ലണ്ട് 592/10. ഓസ്‌ട്രേലിയ 317/10, 214/5. അഞ്ചുമത്സരങ്ങളുടെ പരമ്പരയില്‍ ഓസീസ് 2-1ന് മുന്നിലാണ്. ഇനി അവശേഷിക്കുന്ന ഏകടെസ്റ്റില്‍ ഇംഗ്ലണ്ട് ജയിച്ചാല്‍പ്പോലും പരമ്പര 2-2ന് തുല്യമാവും.
ആദ്യ രണ്ട് ടെസ്റ്റിലും വിജയം കൈയകലെ നഷ്ടമായ ഇംഗ്ലണ്ട് മൂന്നാമത്തെ ടെസ്റ്റില്‍ അവിസ്മരീണയമായി തിരിച്ചുവന്നു. നാലം ടെസ്റ്റില്‍ കംഗാരുക്കളെ കടിച്ചുകീറി മുന്നോട്ട് കുതിക്കുമ്പോഴാണ് ആവേശം തല്ലിക്കെടുത്തി മഴയെത്തിയത്. നാലാം ടെസ്റ്റില്‍ 275 റണ്‍സിന്റെ ഒന്നാം ഇന്നിങ്സ് ലീഡുനേടിയ ഇംഗ്ലണ്ടിന് കളിയില്‍ വ്യക്തമായ മേധാവിത്വമുണ്ടായിരുന്നു. രണ്ടാം ഇന്നിങ്‌സില്‍ ഓസീസ് അഞ്ചിന് 214 എന്നനിലയില്‍ പരുങ്ങുമ്പോഴാണ് രക്ഷകനായി മഴയെത്തിയത്. അപ്പോള്‍ ടീം 61 റണ്‍സിന് പിന്നിലായിരുന്നു. പിന്നീടൊരു സെഷന്‍ കളിക്കാന്‍ കിട്ടിയിരുന്നെങ്കില്‍ ഇംഗ്ലണ്ടിന് ആശിക്കാന്‍ വകയുണ്ടായിരുന്നു.
അവസാന ടെസ്റ്റ് ഓവലില്‍ വ്യാഴാഴ്ച ആരംഭിക്കും.ആദ്യ ടെസ്റ്റില്‍ വെറും രണ്ട് വിക്കറ്റിനായിരുന്നു ഓസട്രേലിയന്‍ ജയം. ഇംഗ്ലണ്ട് ക്യാപ്റ്റന്റെ അമിത ആത്മവിശ്വാസമാണ് ആ ടെസ്റ്റില്‍ ഇംഗ്ലണ്ടിന്റെ നീക്കങ്ങള്‍ പാളിയതും തോല്‍വി ചോദിച്ച് വാങ്ങിയതും.
അന്ന് എട്ട് വിക്കറ്റിന് 393 റണ്‍സ് എന്ന നിലയില്‍ ഇംഗ്ലണ്ട് ആദ്യ അവസാന സെഷനില്‍ ഇന്നിംഗ്സ് ഡിക്ലയര്‍ ചെയ്യുകയായിരുന്നു.ഒരുപക്ഷേ ടീം സ്‌കോര്‍ 400 കടന്നിരുന്നെങ്കില്‍ ഫലം മറിച്ചാകുമായിരുന്നു.
Comments