മാഞ്ചസ്റ്റർ: മാഞ്ചസ്റ്റർ യുണെറ്റഡിന് നിരവധി ആരാധകരാണ് കേരളത്തിലുളളത്. മാഞ്ചസ്റ്റർ ക്ലബ്ബിന്റെ മത്സരങ്ങൾ ഒരിക്കല്ലെങ്കിലും നേരിട്ട് കാണണമെന്നും അവരുടെ ഹോംഗ്രൗണ്ട് സന്ദർശിക്കണമെന്നുമാണ് ആരാധകരുടെ സ്വപ്നം. ഇപ്പോൾ ഇതാ ആ ഭാഗ്യം ലഭിച്ചിരിക്കുകയാണ് മലയാള സിനിമ നിർമ്മാതാവ് ആന്റണി പെരുമ്പാവൂരിന്. അദ്ദേഹം ഓൾഡ് ട്രാഫോർഡിൽ നിന്ന് പങ്കുവച്ച ചിത്രങ്ങളാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
ഭാര്യ ശാന്തി, മക്കളായ ആശിഷ് ജോ ആൻണി, അനീഷ എന്നിവരോടൊപ്പമാണ് ആന്റണി ഓൾഡ് ട്രാഫോർഡ് സന്ദർശിച്ചത്്. അനീഷയുടെ ഭർത്താവ് എമിലിനേയും ചിത്രത്തിൽ കാണാം. ഡ്രസിംഗ് റൂമിലും പുറത്തുനിന്നുമെല്ലാമുള്ള ചിത്രങ്ങൾ പോസ്റ്റിലുണ്ട്.
പോസ്റ്റിന് താഴെ വരുന്ന കമന്റുകളും ഏറെ രസകരമാണ്. തിരിച്ചുവരുമ്പോൾ മാഞ്ചസ്റ്റർ യുണൈറ്റഡിന്റെ കിറ്റ് കൊണ്ടുവരുമോ എന്നാണ് ഒരു ആരാധകൻ ചോദിച്ചിരിക്കുന്നത്. ട്രാൻസ്ഫർ വിപണയിൽ പറയുന്നത് പോലെ ”ഹിയർ വി ഗോ, ആന്റണി പെരുമ്പാവൂർ ടു മാഞ്ചസ്റ്റർ യുണൈറ്റഡ്” എന്ന് മറ്റൊരു ഫുട്ബോൾ പ്രേമിയുടെ കമന്റ്. ”മുന്നേറ്റ നിരയിൽ ആന്റണിയും കൂടി വരുന്നത്തോടെ ടീം ശക്തമാകും. അപ്പൊ ഒരു കാര്യം ഉറപ്പിച്ചു പറയാം അടുത്ത ചാമ്പ്യൻസ് ലീഗ് യുണൈറ്റഡിന് തന്നെ.” എന്ന് മറ്റൊരു ആരാധകനും കമന്റിട്ടിരിക്കുന്നു.
അതേസമയം, ടീം ശക്തിപ്പെടുത്തി മറ്റൊരു സീസണ് ഒരുങ്ങുകയാണ് മാഞ്ചസ്റ്റർ യുണൈറ്റഡ്. പുതിയ സീസണിൽ മികച്ച താരങ്ങളെയെത്തിക്കാൻ എറിക് ടെൻഹാഗിന് മാനേജ്‌മെന്റിന്റെ അനുമതിയുണ്ട്. ഏറെക്കാലമായി മോശം പ്രകടനമാണെങ്കിലും എറിക് ടെൻഹാഗ് എത്തിയതോടെ മാഞ്ചസ്റ്റർ യുണൈറ്റഡിന് നല്ലകാലമാണ്. ഇഎഫ്എൽ കപ്പ് കിരീടം നേടിയ ടീമിന് എഫ്എ കപ്പിൽ ഫൈനലിലെത്താനും ചാമ്പ്യൻസ് ലീഗ് യോഗ്യത ഉറപ്പിക്കാനും കഴിഞ്ഞു.
Comments