രജനികാന്ത് ആരാധകരും മോഹൻലാൽ ആരാധകരും ഒരുപോലെ കാത്തിരിക്കുന്ന ചിത്രമാണ് നെൽസൺ ദിലീപ് കുമാർ സംവിധാനം ചെയ്യുന്ന ‘ജയിലർ’. പ്രഖ്യാപനം മുതൽക്കെ ശ്രദ്ധിക്കപ്പെട്ട ചിത്രത്തിന്റെ ക്യാരക്ടർ പോസ്റ്ററുകളും ടീസറും ഗാനങ്ങളും തരംഗങ്ങൾ സൃഷ്ടിച്ചിരുന്നു. കാവാല, ഹുക്കും എന്നീ ഗാനങ്ങളായിരുന്നു അണിയറ പ്രവർത്തകർ പുറത്തുവിട്ടിരുന്നത്. ഇപ്പോഴിതാ, ചിത്രത്തിലെ മൂന്നാമത്തെ ഗാനമായ ജുജുബിയുടെ ലിറിക്കൽ വീഡിയോ റിലീസ് ചെയ്തിരിക്കുകയാണ്. അടിമുടി മാസ് നിറഞ്ഞ ഗാനമാണ് ജുജുബി.
സൂപ്പർ സുബുവിന്റെ വരികൾക്ക് ചടുലമായ ഈണം പകർന്നിരിക്കുന്നത് അനിരുദ്ധ് രവിചന്ദറാണ്. എൻജോയ് എൻജാമി എന്ന ഗാനം പാടി മനം കവർന്ന ദീ ആണ് ഗാനം ആലപിച്ചിരിക്കുന്നത്. ദീ-യ്ക്കൊപ്പം അനിരുദ്ധും അനന്ത കൃഷ്ണനും ഗാനം ആലപിക്കുന്നുണ്ട്. ഓഗസ്റ്റ് 10-നാണ് ജയിലർ റിലീസ് ചെയ്യുന്നത്. മാസ് ലുക്കിൽ തലൈവർ എത്തുമ്പോൾ വിന്റേജ് ലുക്കിൽ മോഹൻലാലും എത്തുന്നു. രമ്യാ കൃഷ്ണനും ചിത്രത്തിൽ പ്രധാന വേഷത്തിലെത്തുന്നുണ്ട്.
പടയപ്പ എന്ന ചിത്രത്തിന് ശേഷം രജനികാന്തും രമ്യാ കൃഷ്ണനും ഒന്നിക്കുന്നു എന്ന പ്രത്യേകതയും ചിത്രത്തിനുണ്ട്. ‘മുത്തുവേൽ പാണ്ഡ്യൻ’ എന്ന കഥാപാത്രമായാണ് ജയിലറിൽ രജനികാന്തിന്റെ വരവ്. കന്നഡ താരം ശിവരാജ് കുമാറും ചിത്രത്തിൽ പ്രധാന വേഷത്തിൽ എത്തുന്നു. ഐശ്വര്യ റായ്, ശിവകാർത്തികേയൻ, തമന്ന, തൃഷ, പ്രിയങ്കാ മോഹൻ, യോഗി ബാബു, വിനായകൻ എന്നിങ്ങനെ വലിയ താരനിയാണ് ജയിലറിൽ അണിനിരക്കുന്നത്. സൺ പിക്ച്ചേഴ്സിന്റെ ബാനറിൽ കലാനിധി മാരനാണ് ജയിലർ നിർമ്മിക്കുന്നത്. സ്റ്റണ്ട് ശിവയാണ് ആക്ഷൻ കൊറിയോഗ്രാഫർ.
