തിരുവനന്തപുരം: മുതലപ്പൊഴിയിൽ മത്സ്യബന്ധന ബോട്ട് വീണ്ടും അപകടത്തിൽപ്പെട്ടു. ഇന്ന് രാവിലെയാണ് അപകടം നടന്നത്. ശക്തമായ തിരയിൽപ്പെട്ടാണ് വളളം മറിഞ്ഞത്.
വള്ളത്തിലുണ്ടായിരുന്ന മത്സ്യത്തൊഴിലാളി ഷിബുവിനെ രക്ഷപ്പെടുത്തി. അപകടത്തിൽ ഷിബുവിന്റെ കൈയ്ക്കും കാലിനും പരിക്കേറ്റു. മറൈൻ എൻഫോഴ്സ്മെന്റും ഫിഷറീസ് വകുപ്പും ചേർന്നാണ് ഇയാളെ രക്ഷപ്പെടുത്തിയത്.
അപകടങ്ങൾ തുടർക്കഥയാകുന്ന സാഹചര്യത്തിൽ മുതലപ്പൊഴിയിൽ കർശന നിയന്ത്രണങ്ങൾ നടപ്പിലാക്കാൻ ഫിഷറീസ് വകുപ്പ് സർക്കാരിനോട് ആവശ്യപ്പെട്ടിരുന്നു.
ജാഗ്രത മുന്നറിയിപ്പുകൾ ഉള്ള ദിവസങ്ങളിൽ മുതലപ്പൊഴിയിലൂടെയുള്ള കടലിൽപോക്ക് പൂർണമായി വിലക്കണം എന്ന് തിരുവനന്തപുരം ഫിഷറീസ് ഡെപ്യൂട്ടി ഡയറക്ടർ സർക്കാരിന് റിപ്പോർട്ട് നൽകി. കടലിൽ പോകരുതെന്ന മുന്നറിയിപ്പുകൾ ഉണ്ടെങ്കിലും മത്സ്യത്തൊഴിലാളികൾ ഇത് അവഗണിക്കുന്നു. ഈ പശ്ചാത്തലത്തിലാണ് മുതലപ്പൊഴിയിൽ വിലക്ക്. മത്സ്യത്തൊഴിലാളി സംഘടനകളുമായി നടത്തിയ ചർച്ചകൾക്കൊടുവിലാണ് തീരുമാനം.
