ഇന്ത്യൻ ക്രിക്കറ്റ് ചരിത്ര താളുകളിൽ സുവർണ ലിപികളിൽ ആലേഖനം ചെയ്ത പേരാണ് മുൻ ക്യാപ്റ്റൻ എംഎസ് ധോണിയുടേത്.മറ്റൊരു ക്രിക്കറ്റർക്കും അവകാശപ്പെടാനാവാത്ത പലനേട്ടങ്ങളും കൈപിടിയിലൊതുക്കിയ താരം സമ്പത്തിന്റെ കാര്യത്തിലും ലോക ക്രിക്കറ്റർമാരിൽ മുൻനിരയിലാണ്. ചെന്നൈ സൂപ്പർകിംഗ്‌സ് നായകന് ഇപ്പോഴും പ്രതിവർഷം 50 കോടി രൂപയുടെ വരുമാനമുണ്ടെന്നാണ് വിലയിരുത്തൽ. താരത്തിന്റെ സമ്പത്തിന്റെ മൂല്യം 1000 കോടിക്ക് മുകളിലെന്നാണ് റിപ്പോർട്ടുകൾ.
മിഡിൽക്ലാസ് കുടുംബത്തിൽ നിന്ന് വളർന്ന ധോണിയുടെ കഥ ഏറക്കുറെ ‘ധോണി ദി അൺ ടോൾഡ് സ്‌റ്റോറി’യെന്ന ചിത്രത്തിലൂടെ പുറംലോകം അറിഞ്ഞിട്ടുണ്ട്. എന്നാൽ ക്രിക്കറ്റിൽ ഇതിഹാസമായി വളർന്ന ശേഷം ധോണിയുടെ കുടുംബത്തെക്കുറിച്ച് കൂടുതൽ വിവരങ്ങളൊന്നും പുറത്തെത്തിയിരുന്നില്ല. ആകെക്കൂടി വിവരങ്ങൾ പുറത്തുവരുന്നത് ഭാര്യ സാക്ഷിയെയും മകൾ സിവയെയും പറ്റി മാത്രമാണ്.
ധോണിയുടെ സഹോദരങ്ങൾ പ്രശസ്തി ആഗ്രഹിക്കാതെ സ്വകാര്യ ജീവിതം നയിക്കാനാഗ്രഹിക്കുന്നവരാണ് എന്നതാണ് ഇതിന് കാരണം. ധോണിക്കു നരേന്ദ്രസിംഗ് ധോണിയെന്ന ഒരു ചേട്ടനും ജയന്തി ഗുപ്തയെന്ന മൂത്ത സഹോദരിയുമുണ്ട്. ഇരുവരും തീരെ പ്രശസ്തി ആഗ്രഹിക്കുന്നില്ല. പാൻസിംഗ് ധോണിയുടെയും ദേവകി ദേവിയുടെയും ഏക മകളാണ് ഇവർ. ജയന്തിയുടെ യഥാർഥ വയസ്സിനെക്കുറിച്ചുള്ള കൂടുതൽ വിവരങ്ങൾ ലഭ്യമല്ല. എങ്കിലും ധോണിയേക്കാൾ 3-4 വയസിനെങ്കിലും മുതിർന്നതാണ് ജയന്തിയെന്നാണ് വിവരം.
ധോണിയുടെ കായിക ജീവിതത്തിന് ഏറ്റവും അധികം പിന്തുണ നൽകിയത് ജയന്തിയെന്ന സഹോദരിയാണ്. അത് ധോണിയുടെ ജീവിതം ആധാരമാക്കി പുറത്തിറങ്ങിയ ചിത്രത്തിലും അടിവരയിട്ട് പറയുന്നു. പിതാവ് സംശയിക്കുമ്പോഴും ചേച്ചിയാണ് ധോണിയെ മുറുകെ പിടിക്കുന്നത്. ക്രിക്കറ്റിൽ ഒന്നില്ലാതെ നേട്ടങ്ങളെല്ലാം എത്തിപ്പിടിച്ച ധോണിയുടെ ജീവിതം ഇപ്പോൾ ഭാവിതാരങ്ങളുടെ ഒരു പാഠപുസ്തകവും പ്രചോദനവുമാണ്.
സോഷ്യൽ മീഡിയയിൽ നിന്ന് ഒഴിഞ്ഞും മാദ്ധ്യമങ്ങൾക്ക് മുഖം നൽകാതെയു ജീവിക്കുന്ന ജയന്തി ഇപ്പോൾ ജൻമനാടായ ജാർഖണ്ഡിലെ റാഞ്ചിയിലുള്ള ഒരു പബ്ലിക് സ്‌കൂളിലെ ഇംഗ്ലീഷ് അദ്ധ്യാപികയാണ്. ധോണിയുടെ ഉറ്റ സുഹൃത്തുക്കളിൽ ഒരാളായ ഗൗതം ഗുപ്തയെയാണ് ജയന്തി വിവാഹം കഴിച്ചിരിക്കുന്നത്. റാഞ്ചി സ്വദേശിയായ അദ്ദേഹം ചെറുപ്പനാൾ മുതൽ ധോണിയുടെ ഏറ്റവുമടുത്ത സുഹൃത്തുക്കളിൽ ഒരാളായിരുന്നു. കരിയറിന്റെ തുടക്കകാലത്തു ജില്ലാ, സംസ്ഥാന ടീമുകൾക്കു വേണ്ടി ധോണി കളിച്ചിരുന്ന കാലത്തു ഗൗതം ഗുപ്ത ഏറെ സഹായിക്കുകയും പ്രതിസന്ധി ഘട്ടങ്ങളിൽ പിന്തുണയ്‌ക്കുകയും ചെയ്തിരുന്നു. പിന്നീട് ധോണിയുടെ ചേച്ചിയെ വിവാഹം കഴിച്ച ഗൗതം അവരുടെ കുടുംബാംഗങ്ങളിൽ ഒരാളായി മാറുകയും ചെയ്യുകയായിരുന്നു.
