ടെക്നോളജിക്കൊപ്പം സൈബര് തട്ടിപ്പുകളും നാള്ക്ക് നാള് വര്ദ്ധിക്കുകയാണ്. മുന്നറിയിപ്പുകള് പലത് നല്കുന്നുണ്ടെങ്കിലും തട്ടിപ്പില് വീഴുന്നവരുടെ എണ്ണത്തില് കുറവില്ല. അഭ്യസ്തവിദ്യരാണ് പറ്റിക്കപ്പെടുന്നതില് അധികവും.
ഇത്തവണ മുംബൈയിലെ ഒരു യുവതി പറ്റിക്കപ്പെട്ട വിവരമാണ് പുറത്തുവരുന്നത്. ഒറ്റ സന്ദേശത്തിന് പിന്നാലെ 7.8ലക്ഷം രൂപയാണ് ടാറ്റ കണ്സള്ട്ടന്സി സര്വീസിലെ ജീവനക്കാരിയായ 48കാരിക്ക് നഷ്ടമായത്. അന്തേരിയിലെ സുബാഷ് നഗറില് താമസിക്കുന്ന സ്ത്രീക്കാണ് പണം നഷ്ടമായത്.
സംഭവം ഇങ്ങനെ
ജൂലൈ 20നാണ് യുവതിയുടെ ഫോണിലേക്ക് പാര്ട്ട് ജോലി ചെയ്ത് ആയിരങ്ങള് നേടാമെന്ന സന്ദേശം ലഭിക്കുന്നത്. സ്വകാര്യ കമ്പനികള്ക്ക് റേറ്റിംഗ് നല്കി പണം നേടാമെന്നായിരുന്നു വാഗ്ദാനം. ഇതിനായി ടെലിഗ്രാം ആപ്പ് വഴിയാണ് ആശയവിനിമയം ആരംഭിച്ചത്.
ഗ്രൂപ്പില് ജോയിന് ചെയ്തതിന് പിന്നാലെ യുവതിക്ക് ജോയിനിംഗ് എമൗണ്ടായി 250 രൂപ നല്കി. ഇതിന് പിന്നാലെ ബാങ്ക് അക്കൗണ്ടിന്റെ വിവരങ്ങള് നല്കാന് ആവശ്യപ്പെട്ടു. അടുത്ത ദിവസം ഒരു ടാസ്കിനായി 1000 രൂപ അയയ്ക്കാന് പറഞ്ഞു, ടാസ്ക് പൂര്ത്തിയാക്കുമ്പോള് 1,300 തിരികെ നല്കാമെന്നായിരുന്നു വാഗ്ദാനം. ഇതിന് പിന്നാലെ അടുത്ത ടാസ്കിന് 5,000 രൂപ നല്കി പിന്നാലെ 6,600 രൂപ നല്കി യുവതിയുടെ വിശ്വാസം ആര്ജിച്ചു. വീണ്ടും 5,000 രൂപ ആവശ്യപ്പെട്ട സംഘം ടാസ്ക് പൂര്ത്തിയായിട്ടും പണം മടക്കി നല്കിയില്ല.
പണം തിരികെ ആവശ്യപ്പെട്ടപ്പോള്.ട്രെയിഡിംഗിന് താത്പ്പര്യമുണ്ടോ എന്ന് ചോദിച്ചു. യുവതി സമ്മതമറിയിച്ചപ്പോള് 27,000 ആവശ്യപ്പെട്ടു,പണം ഡബിളായി തിരികെ കിട്ടുമെന്നും വിശ്വസിപ്പിച്ചു. എന്നാല് പണം കിട്ടിയില്ല. ഈ 27,000ത്തെപ്പറ്റി ചോദിച്ചപ്പോള് 60,000 രൂപ നല്കാന് ആവശ്യപ്പെട്ടു. എല്ലാ തുകയും ഒരുമിച്ച് നല്കാമെന്നായിരുന്നു വാഗ്ദാനം. ഇതും നല്കിയ ശേഷവും ഒരു രൂപയും അക്കൗണ്ടിലെത്തിയില്ല.
പിറ്റേന്ന് വീണ്ടും സന്ദേശമെത്തി. ട്രെയിഡിംഗ് അക്കൗണ്ടിലെ പ്രശ്നം കൊണ്ടാണ് പണം എത്താത്തതെന്നും ഇത് പരിഹരിക്കാന് ഒരുലക്ഷം നല്കണമെന്നും പറഞ്ഞു. 48കാരി അതും നല്കി. തൊട്ടുപിന്നാലെ ട്രെയിഡിംഗ് ലോണ് അപ്രൂവായെന്ന് കാട്ടി ഒരു മെസേജ് വന്നു. പിന്നാലെ തട്ടിപ്പുകാര് വീണ്ടും 1.39ലക്ഷം ആവശ്യപ്പെട്ടു. യുവതിയുടെ ട്രെയിഡിംഗ് റേറ്റിംഗ് ഇടിഞ്ഞെന്നു കാട്ടിയായിരുന്നു ഇത്. അത് തിരികെ കൊണ്ടുവരാനായിരുന്നു തുകയെന്ന് യുവതിയെ വിശ്വസിപ്പിച്ചു. ഒന്ന് ചിന്തിക്കുക പോലും ചെയ്യാതെ ഇവര് വീണ്ടും പണം നല്കി.
പിന്നാലെ തട്ടിപ്പ് സംഘം 2.43 ലക്ഷം ഗവണ്മെന്റ് ടാക്സ് എന്നപേരില് വാങ്ങി. യുവതിയുടെ അക്കൗണ്ടില് നിന്ന് പണം പോയെങ്കിലും കിട്ടിയില്ലെന്ന് പറഞ്ഞ് വീണ്ടും 3.15 ലക്ഷം രൂപകൂടി വാങ്ങി. എല്ലാ തുകയും ഇരട്ടിയായി ഉടനെ അക്കൗണ്ടിലെത്തുമെന്നായിരുന്നു വാഗ്ദാനം.ഒടുവില് 7.8ലക്ഷം രൂപ നഷ്ടമായെന്നും ഒന്നും തിരികെ കിട്ടിയില്ലെന്നും മനസിലായപ്പോഴാണ് യുവതിക്ക് കബളിപ്പിക്കപ്പെട്ടന്ന കാര്യം മനസിലായത്. രണ്ടുദിവസത്തിന് പിന്നാലെ ഇവര് പോലീസിനെ സമീപിച്ചു. ബാങ്ക് അക്കൗണ്ടിന്റെ വിവരങ്ങളും കൈമാറി.
Comments