എറണാകുളം: ചരിത്രപ്രസിദ്ധമായ തൃപ്പൂണിത്തുറ അത്തം ഘോഷയാത്ര ഓഗസ്റ്റ് 20-ന് നടക്കും. തൃപ്പൂണിത്തുറ നഗരസഭയുടെ നേതൃത്വത്തിലുള്ള കമ്മിറ്റിയാണ് അത്താഘോഷയാത്ര പരിപാടികൾക്ക് നേതൃത്വം നൽകുന്നത്. ഓഗസ്റ്റ് 20-ന് രാവിലെ തൃപ്പൂണിത്തുറ ബോയ്സ് സ്കൂൾ മൈതാനിയിൽ മുഖ്യമന്ത്രി പിണറായി വിജയൻ ഘോഷയാത്ര ഉദ്ഘാടനം ചെയ്യും. ചലച്ചിത്ര താരം മമ്മൂട്ടി ഘോഷയാത്ര ഫ്ലാഗ് ഓഫ് ചെയ്യും.
അത്തം ഘോഷയാത്രയോടനുബന്ധിച്ച് അത്തംനഗറിൽ ട്രേഡ് ഫെയറും, അമ്യൂസ്മെന്റ് പാർക്കും ഒരുക്കും. നിരവധി നാടൻ കലാരൂപങ്ങളും, പ്രഛന്നവേഷങ്ങളും, നിശ്ചല ദൃശ്യങ്ങളും ഘോഷയാത്രയിലുണ്ടാകും. അത്തംനഗറിൽ നിന്ന് ആരംഭിക്കുന്ന ഘോഷയാത്ര ഉച്ചയ്ക്ക് ശേഷം അത്തംനഗറിൽ തന്നെ സമാപിക്കും. ഘോഷയാത്രയിൽ ഇത്തവണ പുതിയ കലാരൂപങ്ങളുണ്ടായിരിക്കുന്നതാണ്. ലായം കൂത്തമ്പലത്തിൽ വിവിധ കലാപരിപാടികൾ നടത്തും. സിയോൺ ഓഡിറ്റോറിയത്തിൽ പൂക്കള മത്സരം സംഘടിപ്പിക്കും. കൺസ്യൂമർ ഫെഡിന്റെ സ്റ്റാളും അത്താഘോഷങ്ങളുടെ ഭാഗമായി തൃപ്പൂണിത്തുറയിൽ ഒരുക്കുന്നുണ്ട്. ലായം കൂത്തമ്പലത്തിൽ ഘോഷയാത്ര ദിനത്തിൽ വൈകിട്ട് കലാസന്ധ്യയുടെ ഉദ്ഘാടനവും നടക്കും.
ഓഗസ്റ്റ് മൂന്ന് മുതൽ 20 വരെ ലായം കൂത്തമ്പലത്തിൽ ചിത്ര-ശിൽപ പ്രദർശനങ്ങൾ നടത്തും. നാല് വർഷത്തെ കാത്തിരിപ്പിന് ശേഷം കഴിഞ്ഞ വർഷമായിരുന്നു വലിയ ആഘോഷങ്ങളിലൂടെ അത്തം ഘോഷയാത്ര നടന്നത്. വിപുലമായ ആഘോഷ പരിപാടികളാണ് ഇത്തവണ ഒരുക്കുന്നതെന്ന് നഗരസഭാ ചെയർപേഴ്സണും, അത്താഘോഷ കമ്മിറ്റി ചെയർപേഴ്സണുമായ രമാ സന്തോഷ് അറിയിച്ചു.
Comments