ഇലക്ട്രിക് വാഹനങ്ങളുടെ നിർമാണ കമ്പനിയുടെ ഓരോ വാഹനങ്ങൾക്കും മികച്ച ജനപ്രീതിയാണ് ലഭിക്കുന്നത്. ഇപ്പോഴിതാ കമ്പനിയുടെ പുതിയ നിയമനമാണ് സമൂഹമാദ്ധ്യമങ്ങളിലെ ചർച്ചാ വിഷയം. കമ്പനി ഒരു പുതിയ ജീവനക്കാരനെ നിയമിച്ചിരിക്കുകയാണ്. ബിജ്‌ലി എന്ന പേരുള്ള നായയെയാണ് പുതിയ ജീവനക്കാരനായി നിയമിച്ചിരിക്കുന്നത്. ബെംഗളൂരുവിലാണ് നിയമനം നടത്തിയിരിക്കുന്നത്.
കമ്പനിയുടെ സഹസ്ഥാപകനായ ഭവിഷ് അഗർവാൾ ആണ് പുതിയ ജീവനക്കാരനെ സമൂഹമാദ്ധ്യമങ്ങളിലൂടെ പരിചയപ്പെടുത്തിയത്. ചിത്രത്തിനൊപ്പം ബിജ്‌ലിയുടെ ഐഡികാർഡിന്റെ ചിത്രവും കമ്പനിയുടെ സഹസ്ഥാപകൻ പങ്കുവെച്ചിട്ടുണ്ട്. മുയലിന്റെ ചെവിക്ക് സമാനമായി ആകർഷകമായ നീളൻ ചെവികളോട് കൂടി വെള്ളയും തവിട്ടും നിറത്തിലുള്ള നായക്കുട്ടിയാണ് ബിജ്‌ലി. ചിത്രവും പേരും ഉൾപ്പെടുത്തിയ ഐഡികാർഡാണ് ബിജ്‌ലിയുടേത്.
440 വി എന്നതാണ് ബിജ്‌ലിയുടെ ഐഡി കാർഡ് നമ്പർ. അടിയന്തിരമായി ബന്ധപ്പെടുന്നതിനുള്ള ഓഫീസ് വിവരങ്ങൾ ഉൾപ്പെടെ ഐഡി കാർഡിൽ നൽകിയിട്ടുണ്ട്. കമ്പനിയുടെ കോരമംഗല ഇൻഡസ്ട്രിയൽ എസ്‌റ്റേറ്റിലാണ് നായ ജോലി ചെയ്യുന്നതെന്നാണ് ഐഡി കാർഡിൽ നൽകിയിരിക്കുന്നത്. നായകളെ വളരെയധികം ഇഷ്ടമുള്ള വ്യക്തിയാണ് ഭവിഷ് അഗർവാൾ. അദ്ദേഹം മുമ്പ് ഓഫീസിലെ സോഫയിൽ നായകൾക്കൊപ്പം ഉറങ്ങുന്ന ചിത്രം സമൂഹമാദ്ധ്യമങ്ങളിൽ ശ്രദ്ധേയമായിരുന്നു.
