തിരുവനന്തപുരം: ദേശീയ പതാക ഉപയോഗിക്കുന്നതിന് മാനദണ്ഡങ്ങൾ പാലിക്കണമെന്ന് നിർദ്ദേശവുമായി പൊതുഭരണ വകുപ്പ്. സ്വാതന്ത്ര്യ ദിനം മുന്നിൽക്കണ്ടാണ് നിർദ്ദേശം. ദേശീയ പതാക ഉപയോഗിക്കുന്ന അവസരങ്ങളിൽ ഫ്ളാഗ് കോഡ് കർശനമായി പാലിക്കണമെന്നാണ് പൊതുഭരണ വകുപ്പിന്റെ നിർദ്ദേശം. കോട്ടൺ, പോളിസ്റ്റർ, നൂൽ, സിൽക്ക്, ഖാദി എന്നിവ ഉപയോഗിച്ച് കൈകൊണ്ട് ഉണ്ടാക്കിയതോ മെഷീൻ നിർമ്മിതമായതോ ആയ ദേശീയ പതാക ആണ് ഉപയോഗിക്കേണ്ടത് എന്ന് നിർദ്ദേശത്തിൽ പരാമർശിച്ചിട്ടുണ്ട്.
ദീർഘ ചതുരാകൃതിയിലുള്ള ദേശീയ പതാക ആയിരിക്കണം ഉപയോഗിക്കേണ്ടത്. നീളവും ഉയരവും 3:2 എന്ന അനുപാതത്തിലായിരിക്കണം ഉണ്ടാകേണ്ടത്. കൂടാതെ ആദരവും ബഹുമതിയും ലഭിക്കുന്ന വിധത്തിലാകണം പതാക സ്ഥാപിക്കേണ്ടത്. കേടുപാടുകൾ സംഭവിച്ചതോ അഴുക്ക് പറ്റിയതോ ആയ പതാകകൾ ഉപയോഗിക്കുവാൻ പാടില്ല. ഒരു കൊടിമരത്തിൽ മറ്റ് പതാകകൾക്കൊപ്പം ദേശീയ പതാക ഉയർത്തുവാൻ പാടില്ല. ദേശീയ പതാക സ്ഥാപിക്കുന്നിടത്ത് അത് മാത്രമേ ഉണ്ടാകാൻ പാടുള്ളൂ. കൂടാതെ ദേശീയ പാതകയേക്കാൾ ഉയരത്തിൽ മറ്റ് പതാകകള് സ്ഥാപിക്കാനും പാടില്ല.
വ്യക്തികൾ, സ്വകാര്യ സ്ഥാപനങ്ങൾ, വിദ്യാഭ്യാസ സ്ഥാപനങ്ങൾ എന്നിവിടങ്ങളിൽ ദേശീയ പതാക എല്ലാ ദിവസവും ഉയർത്തുവാൻ സാധിക്കും. കൂടാതെ വിശേഷ അവസരങ്ങൾ, ആഘോഷങ്ങൾ എന്നീ സന്ദർഭങ്ങളിലും ദേശീയ പതാക അഭിമാന പൂർവ്വം ഉയർത്താവുന്നതാണ്. ദേശീയ പതാകയുടെ അന്തസും ബഹുമാനവും നില നിർത്തി മാത്രമാകണം നടപടി ഉണ്ടാകേണ്ടത്. പൊതു ഇടങ്ങളിലും വ്യക്തികളുടെ വീടുകളിലും ദേശീയ പതാക പകലും രാത്രിയും പ്രദർശിപ്പിക്കാൻ അനുവദിച്ചുകൊണ്ട് 2022 ജൂലൈ 20-ന് ഫ്ളാഗ് കോഡിൽ ഭേദഗതി വരുത്തിയിട്ടുണ്ട്. ഫ്ളാഗ് കോഡ് സെക്ഷൻ -9-ന്റെ പാർട്ട് മൂന്നിൽ പ്രതിപാദിച്ചിരിക്കുന്നവരുടേത് ഒഴികെ മറ്റു വാഹനങ്ങളിൽ ദേശീയ പതാക ഉപയോഗിക്കരുതെന്നും ഫ്ളാഗ് കോഡിൽ പരാമർശിച്ചിട്ടുണ്ട്.
