മത്സ്യവുമായി ബന്ധപ്പെട്ട വിഭവങ്ങളൊക്കെയും എല്ലാവർക്കും പ്രിയപ്പെട്ടതാണ്. ഇതിൽ നിന്നും വ്യത്യസ്തമായി മത്സ്യത്തെ പ്രിന്റ് ചെയ്തെടുക്കുന്ന സാങ്കേതിക വിദ്യയാണ് ഇപ്പോൾ സമൂഹമാദ്ധ്യമങ്ങളിൽ ചർച്ചാ വിഷയം. ഇസ്രയേലിലെ സ്റ്റോക്ക്ഹോൾഡർ ഫുഡ്സ് എന്ന സ്റ്റാർട്ടപ്പാണ് ലോകത്താദ്യമായി 3ഡി പ്രിന്റഡ് മത്സ്യത്തെ അവതരിപ്പിക്കുന്നത്. ലാബിൽ കൃത്രിമമായി നിർമ്മിച്ചെടുത്തതാണ് ഈ 3ഡി പ്രിന്റ് മത്സ്യം.
ലാബിലൊരുക്കിയ പ്രത്യേക സാഹചര്യത്തിൽ കൃത്രിമമായി നിർമ്മിച്ചെടുത്ത മാംസകോശങ്ങളിൽ നിന്നും രൂപപ്പെടുത്തി എടുത്ത മാംസ ഭാഗമാണ് കമ്പനി 3ഡി പ്രിന്റ് ചെയ്ത് പുറത്തെടുത്തത്. സിംഗപ്പൂർ ആസ്ഥാനമായി പ്രവർത്തിക്കുന്ന ഉമാമി മീറ്റ്സുമായി സഹകരിച്ചാണ് കൃത്രിമ മത്സ്യത്തെ കമ്പനി നിർമ്മിക്കുന്നത്. ഗ്രൂപ്പർ മത്സ്യങ്ങളിൽ നിന്നും വേർതിരിച്ചെടുക്കുന്ന കോശങ്ങൾ ഉമാമി മീറ്റ്സ് പ്രത്യേക ലബോറട്ടറി സാഹചര്യങ്ങളിൽ മാംസവും കൊഴുപ്പുമായി നിർമ്മിച്ചെടുക്കുന്നു. ഇതിന് ശേഷം സ്റ്റോക്ക്ഹോൾഡർ കമ്പനി ഇവയെ പ്രത്യേക 3ഡി ബയോ പ്രിന്ററുകൾക്ക് അനുയോജ്യമായ വിധത്തിൽ ജൈവ മഷിയിലേക്ക് ഉൾപ്പെടുത്തുന്നു.
ഇതിന് ശേഷം ഇവയുടെ പ്രവർത്തന ഫലമായാണ് മത്സ്യത്തിന്റെ അതേ ഗുണങ്ങളുള്ള മാംസം ലഭിക്കുന്നു. സസ്യവിഭവങ്ങളും പ്രോട്ടീൻ പോളിസാക്കറൈഡുകൾ ഓർഗാനിക് സംയുക്തങ്ങൾ എന്നിങ്ങനെയുള്ള ജൈവഘടകങ്ങളാണ് ജൈവ മഷിയിൽ ഉൾപ്പെടുത്തിയിട്ടുള്ളത്. എന്നാൽ പരമ്പരാഗത മത്സ്യ ഉത്പാദനത്തെ അപേക്ഷിച്ച് ഇതിന് ചെലവ് കൂടുതലാണ്. ഇതുവരെയും റെസ്റ്റോറന്റുകളിൽ ഇത്തരം പരീക്ഷണം എത്തിയിട്ടില്ല. അടുത്ത വർഷം അവസാനത്തോടെ ഇതിന് അനുമതി ലഭിക്കുമെന്നാണ് വിലയിരുത്തൽ.
Comments