ആഗോളതലത്തിൽ വൻ സ്വീകാര്യത നേടി മുന്നേറുകയാണ് രജനികാന്ത് ചിത്രം ജയിലർ. രണ്ട് ദിവസം കൊണ്ട് 152.02 കോടിയാണ് ചിത്രം നേടിയിരിക്കുന്നത്. ട്രേഡ് അനലിസ്റ്റായ മനോബാലയാണ് ചിത്രത്തിന്റെ കളക്ഷൻ റിപ്പോർട്ട് പുറത്ത് വിട്ടിരിക്കുന്നത്. 15 കോടി കളക്ഷൻ കിട്ടിയതിനാൽ തമിഴകത്തെ ഇൻഡസ്‍ട്രി ഹിറ്റായി ‘ജയിലര്‍’ മാറാനാണ് സാധ്യത.
ജയിലർ റിലീസ് ദിനം 95.78 കോടിയും കഴിഞ്ഞ ദിവസം 56.24 കോടിയുമാണ് നേടിയത്. 2023-ൽ തമിഴ്നാട്ടിലിറങ്ങിയ ചിത്രങ്ങളിൽ ആദ്യ ദിനം ഏറ്റയും ഉയർന്ന കളക്ഷൻ നേടുന്ന ചിത്രം എന്ന റെക്കോർഡ് ജയിലർ സ്വന്തമാക്കുകയും ചെയ്തു. 29.46 കോടി രൂപയാണ് രജനികാന്ത് ചിത്രം നേടിയിരിക്കുന്നത്. അജിത് നായകനായ ‘തുനിവ്’ 24.59 കോടി, മണിരത്നത്തിന്റെ ‘പൊന്നിയിൻ സെല്‍വൻ’ എന്ന ചിത്രത്തിന്റെ രണ്ടാം ഭാഗം 21 കോടി, ‘വാരിസ്’- 19.43 കോടി, ‘മാവീരൻ’- 7.61 കോടി, ‘മാമന്നൻ’- 7.12 കോടി, ‘വാത്തി’- 5.80 കോടി, ‘പത്തു തല’- 5.36 കോടി എന്നിങ്ങനെയാണ് റിലീസ് ദിവസം 2023ല്‍ തമിഴ്നാട്ടിൽ നേടിയത്.
അടിമുടി രജനികാന്ത് നിറഞ്ഞുനില്‍ക്കുന്ന ചിത്രം കളക്ഷനില്‍ എല്ലാ റെക്കോർഡുകളെയും തകർക്കുമെന്ന റിപ്പോർട്ടുകളാണ് പുറത്തു വരുന്നത്. കേരളത്തിൽ 300-ലധികം തിയേറ്ററുകളിലാണ് ജയിലർ റിലീസിനെത്തിയത്. നെൽസൺ സംവിധാനം ചെയ്ത ചിത്രത്തിൽ ടൈഗർ മുത്തുവേൽ പാണ്ഡ്യനായാണ് രജനി എത്തുന്നത്. സൺ പിക്‌ചേഴ്‌സിന്റെ ബാനറിൽ കലാനിധി മാരനാണ് ജയിലർ നിർമ്മിച്ചത്. രജനികാന്തിന്റെ 169-ാമത്തെ ചിത്രമാണിത്. മോഹൻലാലിന് കാമിയോ റോളിൽ വൻ വരേവേൽപ്പാണ് നൽകുന്നത്. മാത്യുവെന്ന റോളിലാണ് മോഹൻലാലിന്റെ വരവ്. രജനിയുടെ മാസിന് കനത്ത വെല്ലുവിളി സൃഷ്ടിച്ചാണ് ലാലേട്ടന്റെ മാസ് എൻട്രി.
Comments