ഗൂഗിൾ ക്രോം ഉപയോക്താക്കൾക്ക് അപകട സാദ്ധ്യതാ മുന്നറിയിപ്പ് നൽകി സർക്കാർ. ബ്രൗസറിൽ ഒന്നിലധികം പ്രശ്നങ്ങൾ കണ്ടെത്തിയതിനെ തുടർന്നാണ് മുന്നറിയിപ്പ്. ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയമാണ് ഗൂഗിൾ ക്രോം ഉപയോക്താക്കൾ ജാഗ്രതാ മുന്നറിയിപ്പ് നൽകിയത്. മന്ത്രാലയത്തിന്റെ കീഴിൽ പ്രവർത്തിച്ചു വരുന്ന കമ്പ്യൂട്ടർ എമർജൻസി റെസ്പോൺസ് ടീം ആണ് ഇതിൽ പിഴവുകൾ കണ്ടെത്തിയത്. തുടർന്ന് സുരക്ഷാ വീഴ്ച സംബന്ധിച്ച് മുന്നറിയിപ്പ് നൽകുകയായിരുന്നു.
മുന്നറിയിപ്പ് പ്രകാരം ക്രോം ഉപയോക്താക്കൾക്ക് അവരുടെ സ്വകാര്യ വിവരങ്ങൾ ചോർത്തപ്പെടാൻ സാദ്ധ്യതയുള്ള തരത്തിൽ നിരവധി സുരക്ഷാ പ്രശ്നങ്ങൾ നേരിടേണ്ടി വന്നേക്കാം. ഇത്തരത്തിൽ ഹാക്ക് ചെയ്യപ്പെട്ടാൽ ക്രോം ഉപയോഗിക്കുന്ന കമ്പ്യൂട്ടർ സിസ്റ്റത്തിന്റെ പൂർണ നിയന്ത്രണം ഹാക്കർമാരുടെ കൈകളിലാകും. ഇത് തടയുന്നതിനുള്ള മാർഗ നിർദ്ദേശങ്ങളും ഏജൻസി മുന്നോട്ട് വെച്ചു.
നിലവിലുള്ള പ്രശ്നങ്ങൾ പരിഹരിക്കുന്നതിനായി ഗൂഗിൾ ഇതിനോടകം തന്നെ പുതിയ അപ്ഡേറ്റ് പുറത്തിറക്കിയിട്ടുണ്ട്. ഇതിൽ ഗൂഗിൾ ക്രോം ഏറ്റവും പുതിയ പതിപ്പിലേക്ക് അപ്ഡേറ്റ് ചെയ്യാനും ഏജൻസി നിർദ്ദേശിച്ചിട്ടുണ്ട്. ഗൂഗിൾ ക്രോം അപ്ഡേറ്റ് ചെയ്യുന്നതിനായി ഉപയോക്താക്കൾ ബ്രൗസർ തുറന്ന് വിൻഡോയുടെ മുകളിൽ വലത് ഭാഗത്തായുള്ള മൂന്ന് ഡോട്ടുകളിൽ ക്ലിക്ക് ചെയ്യുക. ഇതിന് ശേഷം ഉപയോക്താക്കൾ ഹെൽപ്പ് എന്ന ഓപ്ഷൻ തിരഞ്ഞെടുത്ത് ഗൂഗിൾ ക്രോം തിരഞ്ഞെടുക്കുക. ഇതിൽ അപ്ഡേറ്റ് ചെയ്യുക. അപ്ഡേറ്റിന് ശേഷം ക്രോം പ്രവർത്തനം പുനരാരംഭിക്കും.
Comments