രാജ്യത്തിന്റെ അഭിമാനദൗത്യമായ ചന്ദ്രയാൻ-3യുടെ അടുത്ത ഭ്രമണപഥം താഴ്ത്തൽ നാളെ. ബഹിരാകാശ പേടകത്തെ ചന്ദ്രോപരിതലത്തോട് അടുപ്പിക്കുന്നതിനുള്ള അടുത്ത നിർണായക ഘട്ടം നാളെ രാവിലെ 11.30-നും 12.30-നും ഇടയിൽ നടക്കും. ഓഗസ്റ്റ് ഒമ്പതിനാണ് രണ്ടാം ഘട്ട ഭ്രമണപഥം താഴ്ത്തൽ വിജയകരമായി പൂർത്തിയാക്കിയത്.
നിലവിൽ പേടകം ചന്ദ്രനിൽ നിന്നും ഏറ്റവും അടുത്തുള്ള അപ്പോലൂണിൽ നിന്നും 1,437 കിലോമീറ്റർ ദൂരത്താണുള്ളത്. നാളെ നടക്കുന്ന ഭ്രമണപഥം താഴ്ത്തൽ പ്രക്രിയയ്‌ക്ക് ശേഷം പേടകം ചന്ദ്രന് അടുത്ത് വൃത്താകൃതിയിലുള്ള ഭ്രമണപഥത്തിലെത്തും. നാളെയും ഓഗസ്റ്റ് 16-നും നടക്കുന്ന നിർണായക ഘട്ടങ്ങൾ കൂടി വിജയിക്കുന്നതോടെ ചന്ദ്രനും ഉപഗ്രഹവും തമ്മിലുള്ള അകലം 100 കിലോമീറ്ററായി ചുരുങ്ങും. ഇതിന് ശേഷമാകും ഓഗസ്റ്റ് 17-ന് ലാൻഡറും റോവറും ഉൾപ്പെടുന്ന ലാൻഡിംഗ് മൊഡ്യൂൾ പ്രൊപ്പൽഷൻ മൊഡ്യൂളിൽ നിന്നും വേർപെടുത്തുക.
ലാൻഡിംഗ് മൊഡ്യൂൾ വേർപെട്ടതിന് ശേഷം ഇതിന് 30 കിലോമീറ്റർ അകലെയായുള്ള ചന്ദ്രന്റെ അടുത്തായി സ്ഥിതി ചെയ്യുന്ന പെരിലൂൺ എന്ന ഭ്രമണപഥത്തിലേക്ക് പേടകത്തെ എത്തിക്കും. ഇവിടെ നിന്നായിരിക്കും സോഫ്റ്റ് ലാൻഡിംഗിനുള്ള പ്രവർത്തനങ്ങൾ ആരംഭിക്കുക. ഓഗസ്റ്റ് 23-നാണ് സോഫ്റ്റ് ലാൻഡിംഗിനായി നിശ്ചയിച്ചിരിക്കുന്നത്.
Comments