ശ്രീനഗർ: 77-ാം സാതന്ത്ര്യദിനം ആഘോഷിക്കാൻ ജമ്മു കശ്മീർ ഒരുങ്ങി കഴിഞ്ഞു. ആർട്ടിക്കിൾ 370 റദ്ദാക്കിയതിന് ശേഷം വിപുലമായാണ് കശ്മീർ ജനത സ്വാതന്ത്ര്യദിനം ആഘോഷിക്കുന്നത്. ദേശീയതയുടെ ആവേശം ജനങ്ങളിലെത്തിക്കാൻ ഭരണകൂടവും വിപുലമായ തയ്യാറെടുപ്പുകളാണ് നടത്തുന്നത്. ദോഡ ജില്ലയിലെ ഗണപത് പാലം ത്രിവർണ്ണ പതാകയുടെ അതേ നിറത്തിലുള്ള ലൈറ്റിംഗ് കൊണ്ട് അലങ്കരിച്ചത് ഏറെ ശ്രദ്ധേയമായി. ദോഡ ജില്ല ഭരണകൂടം പങ്കുവെച്ച വീഡിയോയിൽ, കൈകളിൽ ത്രിവർണ്ണ പതാകയേന്തി ‘ഭാരത് മാതാ കീ ജയ്’ എന്ന് ആവേശത്തൊടെ വിളിച്ച് നടന്നു പോകുന്ന കശ്മീരി യുവാക്കളെ കാണാം.
സ്വാതന്ത്ര്യദിനത്തിന് മുന്നോടിയായി ‘ആസാദി കാ അമൃത് മഹോത്സവത്തിന്റെ ഭാഗമായി ത്രിവർണ്ണ പതാക വഹിച്ചു കൊണ്ടുള്ള തിരംഗ റാലി കശ്മീരിൽ സംഘടിപ്പിച്ചിരുന്നു. ലെഫ്റ്റനന്റ് ഗവർണർ മനോജ് സിൻഹ ഫ്ലാഗ് ഓഫ് ചെയ്ത റാലി
ഷെർ-ഇ-കശ്മീർ ഇന്റർനാഷണൽ കോൺഫറൻസ് സെന്ററിൽ നിന്ന് ആരംഭിച്ച് ദാൽ തടാകത്തിന്റെ തീരത്തുള്ള ബൊട്ടാണിക്കൽ ഗാർഡനിലാണ് സമാപിച്ചത്.
‘ഇന്ന് ജമ്മു കശ്മീരിന്റെ ആകാശം ത്രിവർണ്ണ പതാകയാൽ തിളങ്ങുന്നു. ഇന്ന് കശ്മീരിലെ യുവാക്കൾ അവരുടെ കൈകളിൽ ത്രിവർണ്ണ പതാക വഹിക്കുകയാണ്. ജനങ്ങളുടെ ഹൃദയങ്ങളിൽ ആവേശം നിറയ്ക്കുകയും അവരെ ഒരുമിപ്പിക്കുകയും ചെയ്ത പ്രധാനമന്ത്രി നരേന്ദ്രമോദിക്ക് നന്ദി’- റാലി ഉദ്ഘാടനം ചെയ്തുകൊണ്ട് ഗവർണർ പറഞ്ഞു.
