രജനികാന്തിനെ നായകനാക്കി നെല്‍സണ്‍ സംവിധാനം ചെയ്‍ത ചിത്രം ജയിലര്‍ ഇൻഡസ്‍ട്രി ഹിറ്റായി മാറുകയാണ്. രാജ്യത്തിനു പുറത്തും ‘ജയിലര്‍’ വൻ വിജയമാണ്. കേരളത്തിൽ മികച്ച കളക്ഷനാണ് ചിത്രം നേടുന്നത്. തെന്നിന്ത്യൻ സൂപ്പർ സ്റ്റാറുകൾ ഒന്നിക്കുന്നതിനാൽ ഭാഷയും ദേശവും കടന്ന് തരംഗം തീർക്കുകയാണ് ജയിലർ. രജനികാന്തിനൊപ്പം മലയാളത്തിലെ സൂപ്പർ സ്റ്റാർ മോഹൻലാലും കന്നടസിനിമ സൂപ്പർ സ്റ്റാർ ശിവരാജ് കുമാറും ഒന്നിച്ചതോടെ ആരാധകരുടെ ആവേശം ഇരട്ടിയായി.
ഇപ്പോഴിതാ സമൂഹമാദ്ധ്യമങ്ങളിൽ വെെറലാകുന്നത് ശിവരാജ് കർണാടകയിലെ ആരാധകർക്കൊപ്പം ജയിലർ കാണുന്നതിന്റെ വീഡിയോയാണ്. സൺ പിക്ചേഴ്സ് ആണ് ഈ വീഡിയോ പങ്കുവച്ചിരിക്കുന്നത്. നെൽസൺ, രജനികാന്ത്, തമിഴ്‌നാട് – കേരള- ആന്ധ്രാ പ്രേക്ഷകർ എന്നിവർക്ക് നന്ദി പറയുന്നുവെന്നും ശിവരാജ് മാദ്ധ്യമങ്ങളോട് പറഞ്ഞു.
‘തമിഴ് ആരാധകരോട് ആദരവും സ്നേഹവും കാണിക്കാൻ ഞാൻ മറക്കില്ല. അതുപോലെ തന്നെ കേരളത്തിലെ പ്രേക്ഷകർക്കും ആന്ധ്രയിലെ പ്രേക്ഷകർക്കും ഞാൻ നന്ദി അറിയിക്കുന്നു’. അദ്ദേഹം പറഞ്ഞു.
ചിത്രത്തിൽ ജയിലർ മുത്തുവേൽ പാണ്ഡ്യൻ എന്ന കഥാപാത്രത്തെയാണ് രജനികാന്ത് അവതരിപ്പിക്കുന്നത്. മാത്യുവെന്ന റോളിലാണ് മോഹൻലാലിന്റെ വരവ്. ശിവ രാജ്‍കുമാറിന്റെ കഥാപാത്രത്തിന്റെ പേര് രാവണ എന്നാണ്. ചിത്രത്തിൽ വിനായകനാണ് രജനികാന്തിന്റെ വില്ലൻ. തമന്ന, രമ്യ കൃഷ്ണൻ, ജാക്കി ഷ്റോഫ്, സുനിൽ തുടങ്ങിയവരാണ് മറ്റു താരങ്ങൾ. വിജയ് കാർത്തികാണ് ഛായാഗ്രഹണം നിർവഹിച്ചത്. സ്റ്റണ്ട് ശിവയാണ് ആക്ഷൻ കൊറിയോഗ്രാഫർ. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമ്മിച്ചത്.
