ലണ്ടൻ: തുമ്മലിന് ഒരു പ്രത്യേകതയുണ്ട്. തുമ്മുന്ന ആളെ മാത്രമല്ല, ചുറ്റുമിരിക്കുന്ന ആളുകളെയും അസ്വസ്ഥമാക്കുന്ന ഒന്നാണത്. അതുകൊണ്ട് തന്നെ ആളുകൾ കൂട്ടം കൂടിയിരിക്കുമ്പോൾ, തുമ്മാൻ വന്നാൽ പലരും അത് പിടിച്ചുവയ്ക്കാറുണ്ട്. തുമ്മൽ വരുമ്പോൾ മുക്കിൻ തുമ്പിൽ ഒന്ന് നുള്ളിയാൽ തുമ്മാതെ നിയന്ത്രിക്കാൻ കഴിയും. ഈ സൂത്രപ്പണി അറിയുന്ന പലരും മാന്യത ഓർത്ത് പൊതുസ്ഥലത്ത് തുമ്മൽ പിടിച്ചുവയ്ക്കുകയാണ് പതിവ്. ഇത്തരത്തിൽ തുമ്മാതെ നിയന്ത്രിച്ച് നിർത്തുന്നത് ശരീരത്തിന് ദോഷം ചെയ്യുമോ? അതെ എന്നാണ് ബ്രിട്ടീഷുകാരനായ യുവാവിന്റെ ജീവിതാനുഭവം സൂചിപ്പിക്കുന്നത്.
മൂക്കിന് തുമ്പിൽ ചെറുതായൊന്ന് നുള്ളും.. അങ്ങനെയായിരുന്നു ബ്രിട്ടീഷ് യുവാവ് തുമ്മൽ പിടിച്ചുനിർത്തിയിരുന്നത്. ഇതുപോലെ നിരവധി പ്രാവശ്യം അദ്ദേഹം തുമ്മലിനെ തടഞ്ഞുനിർത്തിയിരുന്നു. ഒടുവിൽ അദ്ദേഹത്തിന്റെ തൊണ്ടയിൽ ഒരു ദ്വാരം ഉണ്ടായെന്നാണ് ഡോക്ടർമാർ സാക്ഷ്യപ്പെടുത്തുന്നത്. ഭക്ഷണം കഴിച്ചിറക്കുമ്പോൾ ചെറിയ പ്രയാസം, ശബ്ദത്തിൽ മാറ്റം, കഴുത്തിൽ ഒരു വീർമ്മതയും തടിപ്പും, ഈ ലക്ഷണങ്ങൾ കണ്ടതോടെയായിരുന്നു യുവാവ് ചികിത്സ തേടിയത്. വിശദമായ പരിശോധന നടത്തിയതോടെ തൊണ്ടയിൽ തുള വീണിരിക്കുന്നതായി ഡോക്ടർമാർ കണ്ടെത്തി.
തുമ്മാതെ പിടിച്ചുവച്ചത് മൂലം തൊണ്ടയിലെ ചില ടിഷ്യുകൾക്കുള്ളിൽ പൊട്ടലുകൾ സംഭവിച്ചിരുന്നു.
Spontaneous pharyngeal rupture എന്നാണിത് അറിയപ്പെടുന്നത്. ശക്തമായി ചുമയ്ക്കുക, ഛർദ്ദിക്കുക എന്നിവ ചെയ്യുമ്പോൾ സംഭവിക്കുന്ന അവസ്ഥയാണിത്. നിലവിൽ യുവാവിനെ നിരീക്ഷിക്കുകയാണ് വിദഗ്ധ സംഘം. തൊണ്ടയിൽ അണുബാധയുണ്ടാകുന്നത് തടയുകയാണ് ലക്ഷ്യമെന്ന് ഡോക്ടർമാർ അറിയിച്ചു. നിലവിൽ ട്യൂബിലൂടെയാണ് യുവാവിന് ഭക്ഷണം നൽകുന്നത്. രണ്ടാഴ്ചയ്ക്ക് ശേഷം രോഗം ഭേദമാകുമെന്നും മൃദുലമായ ആഹാര പദാർത്ഥങ്ങൾ കഴിച്ചുതുടങ്ങാമെന്നും ഡോക്ടർമാർ അറിയിച്ചു.
