ബെർലിൻ: ചെറിയ അളവിൽ കഞ്ചാവ് കൈവശം വെക്കുന്നതും വളർത്തുന്നതും നിയമവിധേയമാകുന്ന ബില്ലിന് അംഗീകാരം നൽകി ജർമ്മൻ സർക്കാർ. പ്രായപൂർത്തിയായ ഒരാൾക്ക് 25 ഗ്രാം കഞ്ചാവ് കൈവശം വെക്കുന്നതിനും മൂന്ന് ചെടികൾ വരെ വളർത്താനുമുള്ള അനുമതിയാണ് ഈ ബില്ലിലൂടെ പാസാക്കിയിരിക്കുന്നത്. കൂടാതെ, ഇതിലൂടെ ക്ലബ്ബുകളിൽ നിന്നും കഞ്ചാവ് വാങ്ങുന്നതിനുമുള്ള അനുമതിയുമുണ്ട്.
എന്നാൽ കഞ്ചാവ് വാങ്ങുന്നവർ നിയമപരമായി പ്രവർത്തിക്കാൻ അനുമതി നൽകിയിട്ടുള്ള കഞ്ചാവ് ക്ലബ്ബുകളിൽ അംഗങ്ങൾ ആയിരിക്കണം. ഈ ഗ്രൂപ്പുകളിൽ പരമാവധി 500 അംഗങ്ങൾ വരെയാകാം. കൂടാതെ, ഇവർ 18 വയസ്സോ അതിനു മുകളിലോ പ്രായമുള്ളവർ ആയിരിക്കണമെന്നും ജർമൻ നിവാസികൾ ആയിരിക്കണമെന്നും നിയമത്തിൽ പറയുന്നുണ്ട്. പ്രതിദിനം ഒരാൾക്ക് 25 ഗ്രാമും പ്രതിമാസം 50 ഗ്രാം വരെയും വാങ്ങാനുള്ള അനുവാദവും നൽകിയിട്ടുണ്ട്.
ജർമനിയിലെ സ്കൂളുകളിലും നഴ്സറികളിലും കളിസ്ഥലങ്ങളിലും ഇതിന്റെ ഉപയോഗത്തിന് കർശന നിയന്ത്രണം ഏർപ്പെടുത്തിയിട്ടുണ്ട്. ലൈസൻസുള്ള ഔട്ട്ലെറ്റുകളിൽ രാജ്യത്തുടനീളമുള്ള മുതിർന്നവർക്ക് കഞ്ചാവ് വിതരണം ചെയ്യാനുള്ള പദ്ധതി കഴിഞ്ഞവർഷം അവതരിപ്പിച്ചിരുന്നു. എന്നാൽ യൂറോപ്യൻ യൂണിയൻ എക്സിക്യൂട്ടീവ് കമ്മീഷനുമായുള്ള ചർച്ചയെ തുടർന്ന് പിന്നീട് ഇത് പിൻവലിക്കുകയും ചെയ്തു.
Comments