ലക്നൗ: ഉത്തർപ്രദേശ് മുഖ്യമന്ത്രി യോഗി ആദിത്യനാഥിനെ സന്ദർശിച്ച് നടൻ രജനീകാന്ത്. ലക്നൗവിലെ ഔദ്യോഗിക വസതിയിലെത്തിയാണ് താരം സന്ദർശനം നടത്തിയത്. യുപി ഉപമുഖ്യമന്ത്രി കേശവ് പ്രസാദ് മൗര്യയുടെ സാന്നിദ്ധ്യത്തിലായിരുന്നു ഇരുവരുടെയും കൂടിക്കാഴ്ച. തന്നെ സ്വീകരിക്കാനെത്തിയ യോഗി ആദിത്യനാഥിന്റെ കാല്തൊട്ട് വന്ദിച്ചാണ് രജനീകാന്ത് ആദരവ് പ്രകടിപ്പിച്ചത്. രജനിക്ക് മുഖ്യമന്ത്രി പുസ്തകവും ഗണപതിയുടെ വിഗ്രഹവും സമ്മാനമായി നൽകി
ഹിമാലയ പര്യടനത്തിന് ശേഷം ലക്നൗവിൽ എത്തിയ താരം മുഖ്യമന്ത്രി യോഗി ആദിത്യനാഥുമായി കൂടിക്കാഴ്ച നടത്തുമെന്നും വിജയകരമായി പ്രദർശനം തുടരുന്ന തന്റെ ചിത്രം ജയിലറിന്റെ പ്രദർശനത്തിൽ പങ്കെടുക്കുമെന്നും അറിയിച്ചിരുന്നു. ഉത്തർപ്രദേശ് ഉപമുഖ്യമന്ത്രി കേശവ് പ്രസാദ് മൗര്യക്കൊപ്പമാണ് രജനീകാന്ത് ജയിലറിന്റെ സ്പെഷ്യൽ ഷോ കണ്ടത്.
ഇന്നലെ ലക്നൗവിലെത്തിയ താരത്തിനോട് ചിത്രത്തെ കുറിച്ച് നല്ല അഭിപ്രായമാണെന്ന മാദ്ധ്യമപ്രവർത്തകരുടെ ചോദ്യത്തിന് എല്ലാം ഈശ്വരന്റെ അനുഗ്രഹമാണെന്നായിരുന്നു രജനികാന്ത് പറഞ്ഞത്. ജയിലർ റിലീസ് ആകുന്നതിന് തലേന്നാണ് രജനി ഹിമാലയൻ പര്യടനം ആരംഭിച്ചത്.
Comments