യുപിഐ ഉപയോഗിച്ച് ഡിജിറ്റൽ കറൻസിയിൽ ഇടപാട് നടത്താൻ കഴിയുന്ന സംവിധാനം അവതരിപ്പിച്ച് കാനറ ബാങ്ക്. യുപിഐ ഇന്റർ ഓപ്പറേബിൾ ഡിജിറ്റൽ റുപേ മൊബൈൽ ആപ്പിന് ആണ് കാനറ ബാങ്ക് രൂപം നൽകിയത്. രാജ്യത്തെ ബാങ്കിംഗ് മേഖലയിൽ ഈ സേവനം നൽകുന്ന ആദ്യ ബാങ്കാണ് കാനറ ബാങ്ക്. റിസർവ് ബാങ്കിന്റെ സെൻട്രൽ ബാങ്ക് ഡിജിറ്റൽ കറൻസി പൈലറ്റ് പ്രോജക്ടിന്റെ ഭാഗമായാണ് പുതിയ സംഭവം.
കച്ചവടക്കാരുടെ യുപിഐ ക്യൂആർ കോഡ് സ്കാൻ ചെയ്ത് ഇടപാട് നടത്താൻ ഉപഭോക്താവിന് കഴിയുന്നവിധമാണ് സംവിധാനം. കാനറ ബാങ്കിന്റെ ഡിജിറ്റൽ റുപേ ആപ്പ് ഉപയോഗിച്ച് ഡിജിറ്റൽ കറൻസിയിൽ ഇടപാട് നടത്താൻ കഴിയുംവിധമാണ് ക്രമീകരണം ഒരുക്കിയിരിക്കുന്നത്. ഇടപാടിന് ഡിജിറ്റൽ കറൻസിയും സ്വീകരിക്കാൻ കച്ചവടക്കാരെ പ്രാപ്തരാക്കാൻ ലക്ഷ്യമിട്ടാണ് ഈ ഫീച്ചർ. യുപിഐ ഇടപാടുകൾക്ക് പുറമേ നിലവിലെ യുപിഐ ക്യൂആർ കോഡ് ഉപയോഗിച്ച് തന്നെ ഡിജിറ്റൽ കറൻസിയിലും ഇടപാടുകൾ നടത്താൻ പുതിയ സംവിധാനം വഴി സാധിക്കും. അതായത് ഡിജിറ്റൽ കറൻസി ഉപയോഗിച്ചുള്ള ഇടപാടിന് പ്രത്യേക പ്ലാറ്റ്ഫോമിന്റെ ആവശ്യം വേണ്ടി വരുന്നില്ല എന്ന് അർത്ഥം.
ആൻഡ്രോയിഡ്, ഐഒഎസ് ഉപയോക്താക്കൾക്ക് ഒരേ പോലെ ഉപയോഗിക്കാൻ കഴിയുന്നതാണ് കാനറ ബാങ്കിന്റെ ഈ പുതിയ സംവിധാനം. ഉപയോക്താവിന് ഡിജിറ്റൽ കറൻസിയിൽ സുഗമമായി ഇടപാട് നടത്താൻ കഴിയുംവിധമാണ് കാനറ ബാങ്ക് സൗകര്യം ഒരുക്കിയിരിക്കുന്നത്. യുപിഐ ഇടപാടുകൾക്ക് പരിധിയുണ്ടായിരുന്നത് ഇ-കറൻസിയുടെ വരവോടെ പരിമിതിയില്ലാത്ത ഇടപാടുകൾ നടത്താനാകും.
പുത്തൻ സംവിധാനം എങ്ങനെ ഉപയോഗിക്കാം?
കാനറ ഡിജിറ്റൽ റുപേ ആപ്പുള്ള ഉപഭോക്താക്കൾക്ക് വ്യാപാരിയുടെ യുപിഐ ക്യുആർ കോഡ് സ്കാൻ ചെയ്ത് പണം നൽകാം. ഡിജിറ്റൽ കറൻസി ഉപയോഗിച്ചായിരിക്കും പേയ്മെന്റ് പ്രോസസ്സ് ചെയ്യുക. യുപിഐ പേയ്മെന്റുകൾ സ്വീകരിക്കുന്ന വ്യാപാരികൾക്ക് അവരുടെ യുപിഐ ക്യുആർ കോഡുകൾ പ്രദർശിപ്പിച്ച് ഡിജിറ്റൽ കറൻസി പേയ്മെന്റുകളും സ്വീകരിക്കാം. ഡിജിറ്റൽ കറൻസി പേയ്മെന്റുകൾ സ്വീകരിക്കാൻ അവർ ഒരു പ്രത്യേക പ്രക്രിയയിലൂടെ കടന്നുപോകേണ്ടതില്ല.
എന്താണ് ഡിജിറ്റല് കറന്സി?
അച്ചടിച്ച നോട്ടുകള്ക്ക് പകരമുള്ള ഡിജിറ്റല് രൂപമാണ് ഡിജിറ്റല് കറന്സി. അതായത് പണത്തിന്റെ ഇലക്ട്രോണിക് രൂപമെന്നു പറയാം. നോട്ടുകള് അച്ചടിക്കാതെ പുറത്തിറക്കുന്ന ഇത്തരം കറന്സികള്ക്ക് രൂപയുടേതിന് സമാനമായ നിയമസാധുതയുണ്ടാകും. മൊത്ത ഇടപാടിനും ചില്ലറ ഇടപാടിനും രണ്ട് തരത്തില് സിബിഡിസിയാണുണ്ടാകുക. ധനകാര്യ സ്ഥാപനങ്ങള് തമ്മിലുള്ള ഇടപാടുകള്ക്കായിരിക്കും മൊത്തവ്യാപാര കറന്സി. റീട്ടെയില് ഡിജിറ്റല് കറന്സിയാകട്ടെ എല്ലാവര്ക്കും ഉപയോഗിക്കാന് കഴിയും. നെറ്റ്ബാങ്കിങ്, യുപിഐ എന്നിങ്ങനെ നിലവിലുള്ളതുപോലെ ഇടപാട് നടത്താന് ആര്ക്കും കഴിയും.
