ക്വലാലംപൂർ:എത്തുമോ ഇല്ലെയോ എന്ന ആരാധകരുടെ ചോദ്യങ്ങൾക്ക് ഉത്തരമായി. ബ്രസീലിയൻ ഫുട്ബോൾ ഇതിഹാസം നെയ്മർ ഇന്ത്യയിലെത്തും. ഐഎസ്എൽ ക്ലബ്ബായ മുംബൈ സിറ്റി എഫ്സിക്കെതിരെയാണ് എഎഫ്സി ചാമ്പ്യൻസ് ലീഗിൽ നെയ്മറുടെ സൗദി ക്ലബായ അൽ ഹിലാൽ ഏറ്റുമുട്ടുക. ഇരുടീമുകളും എഎഫ്സി ഗ്രൂപ്പിൽ ഒരുമിച്ച് വന്നതോടെയാണിത്. ഗ്രൂപ്പ് ഡിയിൽ മുംബൈ സിറ്റിക്കും അൽ ഹിലാലിനുമൊപ്പം ഇറാനിൽ നിന്നുള്ള എഫ്സി നസ്സാജി മസാൻദരനും ഉസ്ബെക്കിസ്താൻ ക്ലബ് നവ്ബഹോറുമാണ് ഉൾപ്പെട്ടിട്ടുളളത്. എഎഫ്സി ചാമ്പ്യൻസ് ലീഗിന്റെ നറുക്കെടുപ്പ് മലേഷ്യയിലെ ക്വലാലംപൂരിലാണ് നടന്നത്.
മുംബൈ സിറ്റിയും പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയുടെ അൽ നസ്റും തമ്മിൽ എഎഫ്സിയിൽ ഏറ്റുമുട്ടുമോയെന്ന ആകാംക്ഷയിലായിരുന്നു ഫുട്ബോൾ ആരാധകർ. എന്നാൽ നറുക്കെടുപ്പിലാണ് മുംബൈ സിറ്റിയുടെ ഭാഗ്യം നെയ്മറുടെ ഇപ്പോഴത്തെ ക്ലബായ അൽ ഹിലാലിലേക്ക് എത്തിയത്. ഇതോടെ ചാമ്പ്യൻഷിപ്പിൽ പങ്കെടുക്കുന്നതിനായി നെയ്മർ ഇന്ത്യയിലെത്തും. പൂനെയിലേ ശ്രീ ഛത്രപതി സ്പോർട്സ് ക്ലബ്ബിലാണ് മത്സരം. ഇത് ആദ്യമായാണ് നെയ്മർ ഔദ്യോഗിക മത്സരത്തിൽ പന്ത് തട്ടാനായി ഇന്ത്യയിൽ വരുന്നത്. എഫ്സി ചാമ്പ്യൻസ് ലീഗിൽ ഏറ്റവും കൂടുതൽ വിജയമുള്ള ക്ലബാണ് നെയ്മറുടെ അൽ ഹിലാൽ.
Comments