ഡൽഹി: പുതുമുഖ സംവിധായകനുള്ള ഇന്ദിരാഗാന്ധി പുരസ്കാരം മേപ്പടിയാനിലൂടെ വിഷ്ണു മോഹൻ സ്വന്തമാക്കിയതിൽ സന്തോഷം പങ്കുവെച്ച് നടൻ ഉണ്ണി മുകുന്ദൻ. പുതിയ ഒരു സംവിധായകനെ മലയാള സിനിമയ്ക്ക് നൽകാൻ കഴിഞ്ഞതിലും താൻ ആദ്യമായി നിർമ്മിച്ച ചിത്രം ദേശീയ പുരസ്കാരം നേടിയതിലും സന്തോഷമുണ്ടെന്ന് ഉണ്ണി മുകുന്ദൻ പറഞ്ഞു. ഉണ്ണി മുകുന്ദനെ നായകനാക്കി വിഷ്ണു മോഹൻ രചനയും സംവിധാനവും നിർവഹിച്ച മേപ്പടിയാൻ 2022 ജനുവരി 14-നാണ് പുറത്തിറങ്ങിയത്.
‘വളരെ കഷ്ടപ്പെട്ട് ചെയ്ത സിനിമയായിരുന്നു മേപ്പടിയാൻ. ഒരു സംവിധായകനായി മാത്രമല്ല വിഷ്ണു ഒപ്പം നിന്നത്. ഞാൻ ആദ്യമായി നിർമ്മിച്ച ചിത്രമാണ് മേപ്പടിയാൻ. വളരെ ബുദ്ധിമുട്ടിയാണ് സിനിമ പൂർത്തിയാക്കിയതും തിയറ്ററിൽ എത്തിച്ചതും. മേപ്പടിയാന്റെ എല്ലാ അണിയ പ്രവർത്തകർക്കും നന്ദി. ദേശീയ തലത്തിൽ വിഷ്ണുവിന് അവാർഡ് ലഭിച്ചത് എന്നെ സംബന്ധിച്ച് എനിക്ക് ലഭിച്ചതു പോലെയാണ്. മലയാള സിനിമയ്ക്ക് ഇങ്ങനെയൊരു സംവിധായകനെ നൽകാൻ കഴിഞ്ഞതിലും സന്തോഷം’.
‘വിഷ്ണുവിന്റെ സന്തോഷം എന്റെയും സന്തോഷമാണ്. ദേശീയ പുരസ്കാരത്തിൽ നമ്മുടെ സിനിമയുടെ പേര് കേൾക്കാൻ പറ്റിയതിൽ സന്തോഷം. ഇന്ദ്രൻസ് ചേട്ടന് അവാർഡ് കിട്ടിയതിലും സന്തോഷം. ചേട്ടൻ മേപ്പടിയാനിലും ഉണ്ടായിരുന്നു. മേപ്പടിയാന് വലിയ വിജയം സമ്മാനിച്ച ജനങ്ങൾക്കും നന്ദി പറയുന്നു’- ഉണ്ണി മുകുന്ദൻ മാദ്ധ്യമങ്ങളോട് പ്രതികരിച്ചു. നേരത്തെ താഷ്ക്കൻഡ് അന്താരാഷ്ട്ര ചലച്ചിത്രമേളയിലും ബെംഗളൂരു രാജ്യാന്തര ചലച്ചിത്ര മേളയിലും മേപ്പടിയാൻ പുരസ്കാരങ്ങൾ നേടിയിരുന്നു. ദുബായ് എക്സ്പോ ഇന്ത്യ പവലിയനിൽ ആദ്യമായി പ്രദർശിപ്പിച്ച ചിത്രം എന്ന നേട്ടവും മേപ്പടിയാൻ സ്വന്തമാക്കിയിരുന്നു.
Comments