പാടത്തും പറമ്പിലും ചുവന്ന പരവതാനി വിരിച്ചിട്ടതു പോലെ ചീരകൾ നിറഞ്ഞു നിൽക്കുന്ന കാഴ്ചകൾ ഗ്രാമ പ്രദേശത്ത് സർവ്വസാധാരണമാണ്. പച്ച ചീര. ചുവന്ന ചീര അങ്ങനെ ചീര കുടുംബത്തിലുമുണ്ട് വ്യത്യസ്തതകൾ. വൈവിധ്യങ്ങൾ പലതുണ്ടെങ്കിലും ഗുണത്തിന്റെ കാര്യത്തിൽ ഇവരാരും പിന്നിലല്ല. ആകർഷകവും പോഷക സമൃദ്ധവുമായ ചുവന്ന ചീരയെ ഇന്ന് നമുക്ക് പരിചയപ്പെടാം..
രക്തമാരിഷ, പാലക, ആരാമശീതളം, എന്നീങ്ങനെ വിവിധ പേരുകളുള്ള ചുവന്ന ചീരയെ ആയുർവേദത്തിൽ ‘ശാക’ കുടുംബത്തിലാണ് ഉൾപ്പെടുത്തിയിരിക്കുന്നത്. ‘ഭക്ഷണത്തിന് ഉപയോഗിക്കുന്നത് ‘ എന്നാണ് ഈ പദത്തിന്റെ അർത്ഥം.
നിരവധി ആരോഗ്യപ്രശ്നങ്ങൾ കുറയ്ക്കാൻ ചുവന്ന ചീര കേമനാണ്. സോറിയാസിസ് രോഗങ്ങൾ ഉള്ളവരും കുടലിലെ അൾസർ രോഗബാധിതരും ചുവന്ന ചീര ഭക്ഷണത്തിൽ ഉൾപ്പെടുത്തുന്നത് നല്ലതാണ്. ചീരയില ചേർത്തുള്ള കഷായങ്ങൾ കുടിക്കുന്നത് മൂത്രനാളീ സംബന്ധമായ രോഗങ്ങൾ കുറയ്ക്കുന്നതിന് സഹായകമാണെന്നാണ് വിദഗ്ധർ പറയുന്നത്.
മിക്ക സ്ത്രീകളിലും കണ്ടു വരുന്ന പ്രശ്നമാണ് ആർത്തവസമയത്തെ ക്ഷീണവും ഇതു സംബന്ധമായ ബുദ്ധിമുട്ടുകളും. ചിലരിൽ അമിത രക്തസ്രാവവും, വയറു വേദനയും അനുഭവപ്പെടാറുണ്ട്. ആർത്തവം കഴിഞ്ഞാൽ അമിതമായ ക്ഷീണവും തൊണ്ടയിൽ കുരുക്കൾ വരുന്നതും മറ്റു പലരിലും കാണാറുണ്ട്. ഇത്തരം ബുദ്ധിമുട്ടുകൾ അനുഭവിക്കുന്നവർക്ക് നല്ലൊരു പരിഹാരമാണ് ചുവന്ന ചീര കൊണ്ടുണ്ടാക്കിയ ഭക്ഷണ വിഭവങ്ങൾ. കറിയായി കഴിക്കാൻ ഇഷ്ടമില്ലാത്തവർക്ക് ഇത് അരച്ച് ദോശമാവിലോ, ഇഡലി മാവിലോ ചേർത്ത് ആഹാരം ഉണ്ടാക്കി കഴിക്കാവുന്നതാണ്. കറിയായി കഴിക്കുമ്പോൾ ചീര അമിതമായി വേവിക്കാതെ പ്രത്യേകം ശ്രദ്ധിക്കണം. അമിതമായി വേവിക്കുന്നത് ചീരയിലെ പോഷക ഗുണങ്ങൾ കുറയ്ക്കുന്നതിന് ഇടയാക്കുന്നു.
മുലയൂട്ടുന്ന അമ്മമാർക്ക് അത്യുത്തമമാണ് ചുവന്ന ചീര. മുലപ്പാൽ കുറവായ അമ്മമാർ ആട്ടിൻസൂപ്പിൽ ചീരയില പിഴിഞ്ഞ് കുടിക്കുന്നത് പാൽ വർദ്ധിക്കാൻ സഹായകരമാണ്. കുട്ടികൾക്ക് ചുവന്ന ചീരയില നീര് രണ്ട് സ്പൂൺ സമം തേനും ചേർത്ത് ആഴ്ചയിലൊരിക്കൽ നൽകുന്നത് കാഴ്ചശക്തി മെച്ചപ്പെടുത്തുന്നു. വിറ്റാമിനുകളും ധാതുക്കളും ശക്തമായ ആന്റിഓക്സിഡന്റുകളും ധാരാളം ഇതിൽ അടങ്ങിയിട്ടുണ്ട്. ശരീരഭാരം കുറയ്ക്കാൻ ആവശ്യമായ എല്ലാ പോഷകങ്ങളും അടങ്ങിയിരിക്കുന്നതിനാൽ ചുവന്ന ചീര പോലുള്ള ഭക്ഷണങ്ങൾ ഡയറ്റിൽ ചേർക്കാവുന്നതാണ്. ഇനി ചുവന്ന ചീരയെ കാണുമ്പോൾ മുഖം തിരിച്ചു നടക്കാതെ കൂടെ കൂട്ടാം..
