മുംബൈ: നാവികസേനയുടെ അത്യാധുനിക യുദ്ധക്കപ്പലായ മഹേന്ദ്രഗിരി വെള്ളിയാഴ്ച നീറ്റിലിറക്കും, മഡഗാവ് ഡോക് കപ്പൽ നിർമ്മാണ ശാലയിലാണ് കപ്പൽ നിർമ്മിച്ചത്. ഉപരാഷ്ട്രപതി ജഗ്ദീപ് ധൻകർ ചടങ്ങിൽ മുഖ്യാതിഥിയാകും. 2022 ജൂൺ 28 -നാണ് മഹേന്ദ്രഗിരിയുടെ നിർമ്മാണം ആരംഭിച്ചത്. 2027ൽ ഇത് നാവികസേനയുടെ ഭാഗമാകും.
പ്രോജക്ട് 17 എയുടെ ഭാഗമായി നിർമിച്ച ഏഴാമത്തെതും അവസാനത്തേതുമായ യുദ്ധക്കപ്പലാണ് മഹേന്ദ്രഗിരി. ആറാമത്തെ യുദ്ധക്കപ്പലായ വിന്ധ്യഗിരി രാഷ്ട്രപതി ദ്രൗപദി മുർമുവാണ് നീറ്റിലിറക്കിയത്. ഇതേ വിഭാഗത്തിലെ പ്രധാന കപ്പലായ നിലഗിരി 2019 സെപ്തംബർ 28നും ഉദയഗിരി 2022 മെയിലും താരഗിരി അതേവർഷം സെപ്തംബറിലും നീറ്റിലിറക്കി. ഇതിൽ ഉദയഗിരി, താരഗിരി എന്നിവ 2025, 2026 വർഷങ്ങളിൽ സേനയുടെ ഭാഗമാകും.
മെച്ചപ്പെട്ട ആക്രമണശേഷിക്കുപുറമെ അത്യാധുനിക സെൻസറുകളും പ്ലാറ്റ്ഫോം മാനേജ്മെന്റ് സിസ്റ്റങ്ങളും മഹേന്ദ്രഗിരിയിലുണ്ട്. നാവിക സേനയുടെ ബ്യുറോ ഓഫ് നേവൽ ഡിസൈൻസാണ് കപ്പലുകളുടെ രൂപകല്പയ്ക്ക് പിന്നിൽ പ്രവർത്തിച്ചത്.
Comments