ഓണം വാരാഘോഷം;സമാപനസമ്മേളത്തിൽ ആർഡിഎക്സ് താരങ്ങൾ അണിനിരക്കും, ഓണം കളറാക്കാൻ എത്തുന്നത് പെപ്പെയും ഷെയ്നും നീരജും

തിരുവനന്തപുരം: ഓണം വാരാഘോഷത്തിന് നാളെ സമാപനം കുറിക്കും. സമാപന സമ്മേളനം നാളെ വൈകിട്ട് 7 മണിക്ക് നിശാഗന്ധി ഓഡിറ്റോറിയത്തിൽ പൊതുമരാമത്ത്- വിനോദസഞ്ചാര വകുപ്പ് മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും.പൊതുവിദ്യാഭ്യാസ വകുപ്പ് മന്ത്രി വി.ശിവൻകുട്ടി അദ്ധ്യക്ഷത വഹിക്കുന്ന ചടങ്ങിൽ മന്ത്രിമാരായ വീണ ജോർജ്,ആന്റണി രാജു,ജി.ആർ അനിൽ എന്നിവർ മുഖ്യാതിഥികളാകും.

സമാപന സമ്മേളനത്തിൽ തിയറ്ററുകളിൽ തരംഗം തീർക്കുന്ന ആർഡിഎക്‌സ് സിനിമയിലെ അഭിനേതാക്കളായ ഷെയിം നിഗം,നീരജ് മാധവ്,ആൻറണി വർഗീസ് എന്നിവർ വിശിഷ്ടാതിഥികളായി പങ്കെടുക്കും. തിരുവനന്തപുരത്തെ എംപിമാർ,എംഎൽഎമാർ തുടങ്ങിയവർ ചടങ്ങിൽ പങ്കെടുക്കും.മികച്ച കവറേജിന് ഏർപ്പെടുത്തിയ മാധ്യമ പുരസ്‌കാരങ്ങൾ ചടങ്ങിൽ വിതരണം ചെയ്യും.സമാപന സമ്മേളനത്തിനു ശേഷം കെ എസ് ഹരിശങ്കറിന്റെ പ്രഗതി ബാൻഡ് അവതരിപ്പിക്കുന്ന സംഗീത പരിപാടിയും നടക്കും.