ദീർഘനേരം ഇരുന്ന് ജോലി ചെയ്യുന്നവരെ പല ആരോഗ്യപ്രശ്നങ്ങളും അലട്ടാറുണ്ട്. നടുവ് വേദന, കഴുത്ത് വേദന എന്നിങ്ങനെ നിരവധി ബുദ്ധിമുട്ടുകൾ ഇരുന്ന് ജോലിചെയ്യുന്നവർക്ക് അനുഭവിക്കുന്നു. ദീർഘനേരം ഇരിക്കുന്നതും കൈകൾ ശരിയായ രീതിയിൽ ടേബിളിൽ വയ്ക്കാത്തതുമൊക്കെ കഴുത്ത് വേദനയ്ക്ക് കാരണമാകുന്നു. ഇത്തരത്തിൽ കഴുത്ത് വേദന അനുഭവിക്കുന്നവർക്ക് എളുപ്പത്തിൽ ചെയ്യാൻ കഴിയുന്ന ചില യോഗാസനങ്ങളുണ്ട്. അവ ഏതൊക്കെയാണെന്ന് നോക്കാം.
ഇരുന്നും നിന്നും ചെയ്യാൻ കഴിയുന്ന ഒന്നാണ് സ്ട്രെച്ച്. ഏറ്റവും എളുപ്പത്തിൽ കഴുത്ത് വേദന മാറ്റാൻ കഴിയുന്ന ഒന്നാണിത്. തല സാവധാനം വലത്തേക്ക് ചായുക, നിങ്ങളുടെ വലതു ചെവി നിങ്ങളുടെ വലതു തോളിലേക്ക് അടുപ്പിക്കുന്ന വിധത്തിലാണ് ഇത്. ഈ സ്ഥാനത്ത് 10-15 സെക്കൻഡ് പിടിക്കുക, തുടർന്ന് ഇടതുവശത്തേക്ക് അതേ ചലനം ആവർത്തിക്കുക. ഓരോ വശത്തും 2-3 തവണ ഇങ്ങനെ സ്ട്രെച്ച് ചെയ്യുക. കഴുത്ത് വേദനയ്ക്ക് ഇത് ഏറ്റവും നല്ല പ്രതിവിധിയാണ്.
മറ്റൊന്നാണ് എൽബോ റൊട്ടേഷൻ. ഇതിനായി കൈമുട്ടുകൾ സാവാധാനം മടക്കി വിരൽത്തുമ്പുകൾ തോളിനോട് മുട്ടുന്നത് വരെ കൊണ്ടുവരുക. തോളിൽ കൈ വച്ച് കൊണ്ട് കറക്കുക. 10 പ്രാവശ്യം മുന്നോട്ടും 10 പ്രാവശ്യം പിന്നോട്ടും കറക്കുക.
കഴുത്ത് വേദന മാറ്റാൻ കഴിയുന്ന ഒരു യോഗാസനമാണ് ഗോമുഖാസന. ഇതിനായി നിലത്ത് ഇരിക്കുക. ഇടതുകാൽ മടക്കി ഉപ്പൂറ്റിയിൽ കയറി ഇരിക്കുക. ആദ്യം വലതുകാൽ, ഇടതുകാലിന്റെ അപ്പുറത്തേക്ക് വയ്ക്കുക. വലതു കൈ മടക്കി തോളിനു മുകലിലൂടെ പുറകിലേക്ക് പിടിക്കുക. ശേഷം ഇടതു കൈ, വലതു കൈയുമായി പുറകിൽ കോർത്ത് പിടിക്കുക. കുറച്ചുനേരം ഈ സ്ഥിതി തുടരുക. അതിനു ശേഷം തിരിച്ചു വരിക.
മറ്റേ കാലുകൾ ഉപയോഗിച്ചും ചെയ്യണം.
മറ്റൊന്നാണ് ബാലാസന. ഉതിനായി കാൽമുട്ടുകൾ മടക്കി നിലത്ത് ഇരിക്കുക. ശേഷം നിങ്ങളുടെ കൈകൾ മുന്നോട്ട് നീട്ടുക. നെറ്റി നിലത്ത് സ്പർശിക്കണം. ഇത് സ്ഥിതിയിൽ 1-2 മിനിറ്റ് തുടരുക. സാവാധാനം ശ്വാസമെടുക്കുക.
