കോഴിക്കോട്: കിടക്ക ദേഹത്തുവീണ് രണ്ടു വയസുകാരൻ മരിച്ച സംഭവത്തിൽ കൂടുതൽ പരിശോധന. കിടക്ക ദേഹത്ത് വീണ് കുട്ടിയുടെ ശരീരത്തിൽ പുറത്ത് പരുക്കേറ്റിട്ടില്ലെന്ന് മുക്കം സിഐ സുമിത്ത് കുമാർ പറഞ്ഞു. ഇതേതുടർന്ന് ആന്തരാവയവങ്ങൾ രാസപരിശോധന നടത്തുമെന്ന് പോലീസ് വ്യക്തമാക്കി. പൂർണ്ണമായ പോസ്റ്റ്മോർട്ടം റിപ്പോർട്ട് ലഭിച്ചാൽ കാര്യങ്ങൾ കുറച്ചു കൂടി വ്യക്തമാകുമെന്നും അദ്ദേഹം പറഞ്ഞു.
കഴിഞ്ഞ ബുധനാഴ്ചയാണ് മുക്കം മണാശേരി പന്നൂളി സന്ദീപ്-ജിൻസി ദമ്പതികളുടെ മകൻ ജെഫിൻ സന്ദീപ് (2) മരിച്ചത്. മാതാവ് കുട്ടിയെ ഉറക്കിയ ശേഷം കുളിമുറിയിലേക്ക് പോയ സമയത്ത് ചുമരിൽ ചാരിവെച്ചിരുന്ന കിടക്ക ഉറങ്ങിക്കിടക്കുകയായിരുന്ന ജെഫിന്റെ മുകളിലേക്ക് വീഴുകയായിരുന്നു. കുളിക്കാന് പോയി വന്ന ശേഷം നോക്കിയപ്പോഴാണ് മെത്തയുടെ അടിയില് കിടക്കുന്ന ജെഫിനെ കണ്ടതെന്നാണ് ജിന്സി പോലീസിന് നൽകിയ മൊഴി. ഉടന് തന്നെ കുട്ടിയെ കോഴിക്കോട് കെഎംസിടി ആശുപത്രിയില് എത്തിച്ചു. എന്നാല് ആശുപത്രിയില് എത്തും മുന്പ് തന്നെ കുട്ടി മരിച്ചിരുന്നെന്നാണ് അധികൃതരുടെ വിശദീകരണം.
ശ്വാസകോശ വാൽവിന് പ്രശ്നങ്ങളെ തുടർന്ന് കുട്ടി ചികിത്സയിലായിരുന്നെന്നാണ് ബന്ധുക്കൾ പോലീസിനെ അറിയിച്ചിരിക്കുന്നത്. കുട്ടിയുടെ മൃതദേഹം പിന്നീട് മറ്റു നടപടികൾക്കായി കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. എന്നാൽ സംഭവത്തില് നാട്ടുകാർ ദുരൂഹത ആരോപിച്ചിരുന്നു. കൂടുതൽ പരിശോധനകൾക്ക് ശേഷം മാത്രമേ കൃത്യമായ മരണ കാരണം വ്യക്തമാകൂ എന്നാണ് പോലീസ് പറയുന്നത്.
