ന്യൂഡൽഹി: ജി 20 ഉച്ചകോടിയിൽ പങ്കെടുക്കുന്നതിനെത്തിയ യുകെ പ്രധാനമന്ത്രി ഋഷി സുനകിന്റെയും ബംഗ്ലാദേശ് പ്രധാനമന്ത്രി ഷെയ്ഖ് ഹസീനയുടെയും ചിത്രം ഏറ്റെടുത്ത് സാമൂഹ്യമാദ്ധ്യമങ്ങൾ. ഷെയ്ഖ് ഹസീനയ്ക്ക് സമീപം മുട്ടുകുത്തിയിരുന്ന് സംസാരിക്കുന്ന ഋഷി സുനകിന്റെ ചിത്രമാണ് സാമൂഹ്യമാദ്ധ്യമ ലോകത്ത് ചർച്ചയാകുന്നത്. സുനകിന്റെ ബഹുമാനത്തെയും എളിമയെയും പ്രശംസിച്ച് നിരവധി പേരാണ് രംഗത്തെത്തിയിരിക്കുന്നത്.
ജി20 ഉച്ചകോടിയിൽ പങ്കെടുക്കാനാണ് ഋഷി സുനകും ഷെയ്ഖ് ഹസീനയും ഡൽഹിയിലെത്തിയത്. ഇരുവരും തമ്മിൽ സംസാരിക്കുന്നതിനിടെ സുനക് തറയിൽ മുട്ടുകുത്തിയിരിക്കുന്ന ചിത്രമാണ് സാമൂഹ്യമാദ്ധ്യമത്തിൽ തരംഗമാകുന്നത്. മുട്ടുകുത്തിയിരിക്കുന്ന സുനകിന്റെ കാലിൽ ചെരുപ്പില്ല എന്നതും ചിത്രത്തിന്റെ സവിശേഷത കൂട്ടി.
ജി20 യുടെ സമാപന ദിവസമായ ഇന്നലെ ഋഷി സുനക് ഭാര്യ അക്ഷതാ മൂർത്തിയോടൊപ്പം ഡൽഹിയിലെ അക്ഷർധാം ക്ഷേത്രത്തിൽ ദർശനം നടത്തിയിരുന്നു. ക്ഷേത്രദർശനത്തിന് ശേഷം അദ്ദേഹം രാജ്ഘട്ടിലെത്തി മഹാത്മാഗാന്ധിയ്ക്ക് സ്മരണാജ്ഞലി അർപ്പിക്കുകയും ചെയ്തു.
