ഒരുപാട് ആവേശത്തോടെ മലയാള സിനിമാപ്രേമികൾ കാത്തിരിക്കുന്ന ചിത്രമാണ് ‘മലൈക്കോട്ടൈ വാലിബൻ’. താരരാജാവ് മോഹൻലാലിനെ നായകനാക്കി ലിജോ ജോസ് പെല്ലിശേരി ഒരുക്കുന്ന ചിത്രം എന്ന പ്രത്യേകതയും മലൈക്കോട്ടൈ വാലിബനുണ്ട്. ചിത്രത്തിന്റെ ഓരോ അപ്ഡേഷനുകളും ആരാധകരെ ആവേശത്തിലാഴ്ത്തുന്നവയാണ്. ഇതുവരെ കാണാത്ത ഗെറ്റപ്പിലാകും മോഹൻലാലിന്റെ വരവെന്നതും ചിത്രത്തിന് പ്രതീക്ഷകൾ കൂട്ടുകയാണ്.
രാജ്യത്തിന്റെ പലഭാഗങ്ങളിലായിട്ടാണ് സിനിമയുടെ ചിത്രീകരണം പൂർത്തിയായത്. ഇപ്പോഴിതാ ചിത്രത്തിന്റേതെന്ന തരത്തിൽ ഒരു വീഡിയോ സമൂഹ മാദ്ധ്യമങ്ങളിൽ പ്രചരിക്കുന്നുണ്ട്. ചിത്രത്തിനായി നിർമ്മിച്ച കൂറ്റൻ സെറ്റിന് തീപിടിക്കുന്നതായുള്ള വീഡിയോയാണ് ഇത്. മൊത്തം പുകമയമായ അന്തരീക്ഷത്തിൽ വെടിയൊച്ചകൾ മുഴങ്ങുന്നതും വീഡിയോയിൽ കേൾക്കാം. ഒപ്പം വാളുകൊണ്ട് എതിരാളികളെ നേരിടുന്ന ഒരു നടനെയും കാണാം.
വാളുമായി എതിരാളികളെ നേരിടുന്നത് മോഹൻലാൽ ആണെന്നാണ് ആരാധകരുടെ അഭിപ്രായങ്ങൾ. എന്നാൽ വീഡിയോയിൽ കാണുന്ന വ്യക്തി മോഹൻലാൽ ആണോ എന്ന കാര്യത്തിൽ വ്യക്തതക്കുറവുണ്ട്. ചിത്രീകരണത്തിനിടെ ആരോ പകർത്തിയ രംഗം സോഷ്യൽ മീഡിയയിൽ പ്രചരിച്ചതാണെന്ന് അണിയറ പ്രവർത്തകർ പറയുന്നു. എന്നാൽ വീഡിയോയിൽ കാണുന്ന താരം മോഹൻലാൽ ആണോ എന്ന കാര്യത്തിൽ അണിയറപ്രവർത്തകരും സ്ഥിരീകരണം നൽകിയിട്ടില്ല.
അതേസമയം, മലൈക്കോട്ടൈ വാലിബന്റെ റിലീസുമായി ബന്ധപ്പെട്ട് നിരവധി അഭ്യൂഹങ്ങൾ സോഷ്യൽ മീഡിയയിലടക്കം നടക്കുന്നുണ്ട്. പുറത്ത് വരുന്ന വാർത്തകൾ അനുസരിച്ച് ഡിസംബർ 22 ന് ചിത്രം പ്രദർശനത്തിന് എത്തും എന്നാണ്. അതേസമയം 2024 ൽ വിഷു റിലീസ് ആയും ചിത്രം തിയറ്ററുകളിലെത്തും എന്ന തരത്തിലും വാർത്തകൾ പ്രചരിക്കുന്നുണ്ട.്
