ഇന്ന് മലയാളത്തിന്റെ പ്രിയനടൻ ഉണ്ണി മുകുന്ദൻ പിറന്നാൾ ആഘോഷിക്കുകയാണ്. താരത്തിന്റെ പിറന്നാൾ ദിനത്തിൽ നിരവധി പേരാണ് ആശംസകൾ അറിയിച്ചിരിക്കുന്നത്. ഇപ്പോഴിതാ ഉണ്ണിയുടെ പിറന്നാൾ ദിനത്തിൽ താരത്തിന്റെ ഉറ്റസുഹൃത്തും സംവിധായകനുമായ വിഷ്ണു മോഹൻ സമൂഹമാദ്ധ്യമത്തിൽ ഒരു ഹൃദയസ്പർശിയായ കുറിപ്പ് പങ്കുവെച്ചിരിക്കുകയാണ്. ഈ കുറിപ്പാണ് ഇപ്പോൾ വൈറലായിരിക്കുന്നത്.
‘പ്രിയപ്പെട്ട ഉണ്ണി, കഴിഞ്ഞ അഞ്ചുവർഷമായി ഈ ദിനം നമ്മൾ ഒന്നിച്ചാണ് ആഘോഷിക്കുന്നത്. എന്നാൽ ഇന്ന് നമ്മൾ രണ്ടുപേരും രണ്ട് സ്ഥലങ്ങളിലാണ്. ആദ്യ മൂന്ന് വർഷം നമ്മൾ ഒരേ ലക്ഷ്യത്തിനായി ഒന്നിച്ച് പ്രവർത്തിച്ചു. ഇപ്പോൾ ലക്ഷ്യം കൈവരിച്ചിരിക്കുന്നു. നിരവധി നേട്ടങ്ങളും അപ്രതീക്ഷിത നിമിഷങ്ങളും നമ്മൾ പങ്കുവെച്ചു. വീണ്ടും ഒരുപാട് പ്രോജക്ടുകളിൽ സാഹചര്യം നമ്മെ ഒന്നിപ്പിക്കട്ടെയെന്ന് ഞാൻ ആഗ്രഹിക്കുന്നു. നിന്റെ നേട്ടങ്ങളിൽ ഒപ്പം നിൽക്കാൻ സാധിക്കുമെന്നും പ്രതീക്ഷിക്കുന്നു’ – എന്നാണ് വിഷ്ണു മോഹൻ കുറിച്ചത്.
അതേസമയം ഉണ്ണിമുകുന്ദനും വിഷ്ണു മോഹനും സിനിമ തിരക്കുകളിലാണ്. ഉണ്ണി തമിഴ് സിനിമയുടെ ചിത്രീകരണ തിരക്കിൽ ആണെങ്കിൽ വിഷ്ണു തന്റെ പുതിയ സിനിമയുടെ ലൊക്കേഷനിലാണ്. മേപ്പടിയാനിലൂടെയാണ് ഇരുവരും ആദ്യമായി ഒന്നിച്ചത്. ഏറെ പ്രശംസകളും ദേശീയ പുരസ്കാരമടക്കം നിരവധി അംഗീകാരങ്ങളും മേപ്പടിയാനെ തേടിയെത്തിയിരുന്നു.