ഫെയ്സ്ബുക്കിൽ ഒന്നിലധികം വ്യക്തിഗത പ്രൊഫൈലുകൾ ക്രിയേറ്റ് ചെയ്യുന്നതിനായി ഉപയോക്താക്കളെ സഹായിക്കുന്ന മൾട്ടിപ്പിൾ പേഴ്സണൽ പ്രൊഫൈൽ ഫീച്ചർ അവതരിപ്പിച്ച് മെറ്റ. ഫെയ്സ്ബുക്ക് ഉപയോഗിക്കുമ്പോൾ കൂടുതൽ സ്വാതന്ത്ര്യത്തോടെ സേവനം ലഭ്യമാക്കാൻ സഹായിക്കുക എന്ന ലക്ഷ്യം മുന്നിൽ കണ്ടാണ് മെറ്റ പുതിയ ഫീച്ചർ അവതരിപ്പിച്ചിരിക്കുന്നത്. പ്രൊഫഷണൽ-വ്യക്തിപരമായ ജീവിതം രണ്ടായി നിലനിർത്താൻ ആഗ്രഹിക്കുന്നവർക്ക് ഈ ഫീച്ചർ വളരെയധികം ഉപകാരപ്രദമാകുമെന്ന് കമ്പനി പറയുന്നു.
മിക്കപ്പോഴും ഉപയോക്താക്കൾക്ക് രണ്ട് അക്കൗണ്ട് ആരംഭിക്കേണ്ടതായ സാഹചര്യം വരാറുണ്ട്. ഫീച്ചർ നിലവിൽ വരുന്നതോടെ ഇതിന് ഒരു പരിഹാരമാണ്. ഒരു അക്കൗണ്ടിൽ നാല് പ്രൊഫൈലുകൾ വരെ ക്രിയേറ്റ് ചെയ്യാനാകുന്ന തരത്തിലാണ് പുതിയ ഫീച്ചർ അവതരിപ്പിക്കുന്നത്. ഇതോടെ ഓരോ പ്രൊഫൈലുകളും വീണ്ടും വീണ്ടും ലോഗിൻ ചെയ്ത് കയറേണ്ടതായ സാഹചര്യമില്ല. പെട്ടെന്ന് തന്നെ പ്രൊഫൈലുകൾ സ്വിച്ച് ചെയ്ത് ഉപയോഗിക്കാനാകും.
എല്ലാ പ്രൊഫൈലുകളും പ്രധാന പ്രൊഫൈൽ ആയി തന്നെ പ്രവർത്തിക്കും എന്നതാണ് ഫീച്ചറിന്റെ പ്രധാന പ്രത്യേകത. ഇതിന് പുറമേ പ്രധാന പ്രൊഫൈലിൽ നിന്നും ക്രിയേറ്റ് ചെയ്തിട്ടുള്ള മറ്റൊരു അക്കൗണ്ട് ആണ് ഇതെന്ന് വെളിപ്പെടുത്താൻ താത്പര്യമില്ല എങ്കിൽ ഇതും മറച്ചുവെക്കാനാകും. ഇത്തരത്തിൽ പ്രൊഫൈൽ ക്രിയേറ്റ് ചെയ്യുന്നതിനായി ഫെയ്സ്ബുക്കിലെ ടാബിൽ ക്ലിക്ക് ചെയ്യുക. ശേഷം പ്രൊഫൈൽ തിരഞ്ഞെടുക്കുന്നതിനുള്ള ഓപ്ഷൻ തിരഞ്ഞെടുക്കുക. ഇതിന് ശേഷം പ്രൊഫൈലിന് പേരും യൂസർ നെയിമും നൽകാവുന്നതാണ്.
