ഭുവനേശ്വർ: പ്രധാനമന്ത്രി നരേന്ദ്രമോദിയെയും കേന്ദ്ര സർക്കാരിനെയും പിന്തുണച്ച് ഒഡിഷ മുഖ്യമന്ത്രി നവീൻ പട്നായിക്. പ്രധാനമന്ത്രിയുടെ നയങ്ങൾക്ക് പത്തിൽ എട്ട് എന്നാണ് അദ്ദേഹത്തിന്റെ റേറ്റിംഗ്. കേന്ദ്രത്തിന്റെ വിദേശനയത്തെയും സർക്കാരിന്റെ അഴിമതിവിരുദ്ധ പ്രവർത്തനങ്ങൾക്കുമാണ് പട്നായികിന്റെ പിന്തുണ. ഭുവനേശ്വറിൽ നടന്ന ഒഡീഷ ലിറ്റററി ഫെസ്റ്റിവലിലെ സംവാദത്തിലാണ് അദ്ദേഹം ഇത് പറഞ്ഞത്.
വിദേശ നയത്തിലും മറ്റ് കാര്യങ്ങളിലും പ്രധാനമന്ത്രി നിരവധി കാര്യങ്ങൾ ചെയ്തു. ഇപ്പോഴത്തെ കേന്ദ്ര സർക്കാരിൽ അഴിമതി ഇല്ല. അഴിമതി വേരോടെ പിഴുതെറിയാൻ പ്രധാനമന്ത്രി ശക്തമായ നീക്കങ്ങളാണ് നടത്തുന്നത്. നമ്മുടെ രാജ്യത്തെ ജനങ്ങളെ സേവിക്കാൻ നരേന്ദ്രമോദിയാണ് ഏറ്റവും നല്ലത്. മോദിസർക്കാരിനെ ’10 ൽ 8′ എന്ന് റേറ്റുചെയ്യുന്നതായും അദ്ദേഹം പറഞ്ഞു.
കേന്ദ്രവുമായി തങ്ങൾക്ക് നല്ല ബന്ധമാണ്. ഒഡിഷയുടെ വികസനമാണ് തങ്ങൾ ആഗ്രഹിക്കുന്നത്. സ്വാഭാവികമായും കേന്ദ്രത്തെ പങ്കാളിയാക്കാണ്. പ്രധാനപ്പെട്ട ഒരു ചുവടുവെപ്പാണ് വനിതാ സംവരണ ബിൽ. വൺ നേഷൻ വൺ ഇലക്ഷനെ സ്വാഗതം ചെയ്യുന്നു പട്നായിക് കൂട്ടിച്ചേർത്തു.