ഇന്ന് ഗൂഗിളിന് ഇരുപത്തിയഞ്ചാം ജന്മദിനം. പിറന്നാൾ നിറവിൽ നിൽക്കുന്ന ഗൂഗിളിന് പറയാനുള്ളത് ഇരുപത്തിയഞ്ച് വർഷത്തെ നാൾവഴികളെ കുറിച്ചാണ്. ലോക ജനതയുടെ നിത്യ ജീവിതത്തിൽ ഗൂഗിളുമായി ബന്ധപ്പെടാത്ത ഒരു ദിനം പോലും ഉണ്ടായെന്ന് വരില്ല. ഇങ്ങ് ഇരുപത്തിയഞ്ച് വർഷങ്ങൾക്കിപ്പുറം ലോകത്തിലെ തന്നെ ഏറ്റവും ശക്തമായ സെർച്ച് എഞ്ചിനായി ഗൂഗിൾ മാറി. വാർത്തകൾക്ക് വേണ്ടിയും മറ്റ് വിശദാംശങ്ങൾക്കുവേണ്ടിയും പ്രതിദിനം ഒരു തവണയെങ്കിലും നാം ഗൂഗിളിനെ ആശ്രയിക്കാറുണ്ട്. ലോകം വിരൽത്തുമ്പിലെന്ന് വേണമെങ്കിൽ ഗൂഗിളിനെ നിർവചിക്കാം.
ഇപ്പോഴിതാ 25-ാം പിറന്നാൾ ദിനത്തിനോടനുബന്ധിച്ച് മുൻവർഷങ്ങളിലേതിലും വ്യത്യസ്തമായ ഡൂഡിലാണ് ഗൂഗിൾ അവതരിപ്പിച്ചിരിക്കുന്നത്. നിർണായകമായ 25 വർഷങ്ങളെ അടയാളപ്പെടുത്തുന്നതിനായി ഗൂഗിളിനെ G25gle എന്നാണ് ഡൂഡിൽ മാറ്റിയിരിക്കുന്നത്. ലോഗോയിൽ ക്ലിക്ക് ചെയ്യുകയാണെങ്കിൽ വിവിധ നിറങ്ങളാൽ മനോഹരമായ മറ്റൊരു പേജിലേക്കാകും കടക്കുക.
1998 സെപ്റ്റംബർ 27-ന് സെർഗി ബ്രിനും ലാറി പേജും സംയുക്തമായി സഹകരിച്ചാണ് ഗൂഗിൾ യാഥാർത്ഥ്യമാക്കുന്നത്. ലോകത്തിലെ ഏറ്റവും വലിയ സെർച്ച് എഞ്ചിനാണ് ഇന്ന് ഗൂഗിൾ. പല വിധത്തിലുള്ള അറിവുകൾ ഒറ്റക്കുടക്കീഴിൽ ലഭ്യമാക്കുക എന്നതാണ് ലക്ഷ്യം. ഇന്ത്യൻ വംശജനായ സുന്ദർ പിച്ചൈയാണ് ഗൂഗിളിന്റെ സിഇഒ.