ന്യൂഡൽഹി: ഏഷ്യൻ ഗെയിംസിൽ വനിതകളുടെ 25 മീറ്റർ പിസ്റ്റൾ ഷൂട്ടിംഗ് ടീം ഇനത്തിൽ സ്വർണ മെഡൽ കരസ്ഥമാക്കിയ താരങ്ങളെ അഭിനന്ദിച്ച് പ്രധാനമന്ത്രി നരേന്ദ്രമോദി. ട്വിറ്റർ(എക്സ്) ലൂടെയാണ് പ്രധാനമന്ത്രി വനിതാ താരങ്ങളെ അഭിനന്ദിച്ചത്.
‘രാജ്യത്തിന് വേണ്ടിയുള്ള ശ്രേഷ്ടമായ സ്വർണ നേട്ടമാണിത്. വനിതകളുടെ 25 മീറ്റർ പിസ്റ്റൾ ഷൂട്ടിംഗിൽ മിന്നും വിജയം കരസ്ഥമാക്കിയ ഇന്ത്യൻ ടീമിന് അഭിനന്ദനങ്ങൾ. അവരുടെ ശ്രദ്ധേയമായ ടീം വർക്കാണ് മികച്ച റിസൾട്ട് നൽകിയത്. അവരുടെ വിജയം നിറഞ്ഞ ഭാവിയ്ക്കായി ആശംസിക്കുന്നു- പ്രധാനമന്ത്രി ട്വിറ്ററിൽ കുറിച്ചു.
മനു ഭാക്കർ, ഈഷ സിംഗ്, സാഗ്വാൻ റിഥം എന്നിവരടങ്ങിയ ടീമാണ് വനിതകളുടെ 25 മീറ്റർ പിസ്റ്റൾ ഷൂട്ടിംഗ് ഇനത്തിൽ ഇന്ത്യയ്ക്ക് വേണ്ടി സ്വർണം നേടിയത്. 1759 സ്കോർ നേടിയാണ് ചൈനയെ പിന്തള്ളി ഇന്ത്യൻ ടീം മുന്നിലെത്തിയത്. 1756 പോയിന്റാണ് ചൈനയുടെ സ്കോർ. റിപ്പബ്ലിക്ക് ഒഫ് കൊറിയ 1742 പോയിന്റോടെ വെങ്കലം സ്വന്തമാക്കി.