സമ്പൂർണ്ണ വാരഫലം – 2023 ഒക്ടോബർ 1 മുതൽ ഒക്ടോബർ 7 വരെയുള്ള (1199 കന്നി 15 – കന്നി 21 )വരെ
ഈ വാരത്തിൽ അശ്വതി, ഭരണി, കാർത്തിക, രോഹിണി, മകയിര്യം, പുണർതം, തിരുവാതിര നക്ഷത്രക്കാർ അവരവരുടെ നക്ഷത്രം വരുന്ന ദിവസം വൃതം അനുഷ്ഠിക്കുന്നതും ക്ഷേത്രത്തിൽ പോയി തൊഴുതു യഥാവിധി വഴിപാടുകൾ നടത്തുന്നതും ഉചിതമായിരിക്കും.
ശ്രദ്ധിക്കുക: വാര/മാസ ഫലങ്ങൾ ഗണിക്കുന്നത് പൊതുവെ ഉള്ള ഗ്രഹസ്ഥിതി അടിസ്ഥാനപ്പെടുത്തിയാണ്. ഇവിടെ പറയുന്നത് ഒരു പൊതു സൂചന മാത്രമായിരിക്കും. അവരവരുടെ ജന്മ ഗ്രഹനില വിശകലനം ചെയ്ത് യോഗങ്ങളും അനുസരിച്ചു ദശാപഹാരവും കൂടി പരിഗണിച്ചാൽ ഈ പൊതു ഫലത്തിന് ഏറ്റക്കുറച്ചിലുകൾ ഉണ്ടാകും. എന്നിരുന്നാലും ഈ പറയുന്ന പൊതുഫലത്തെ സൂചനയായി കണ്ടു, ജാതക നിരൂപണം നടത്തി, ദശാനാഥനെ പ്രീതിപ്പെടുത്തുകയും ഗ്രഹദോഷങ്ങൾ പരിഹരിക്കുകയും ചെയ്താൽ അനുകൂല സമയത്തിന്റെ ഗുണഫലങ്ങൾ അനുഭവത്തിൽ വരുത്തുവാനും, പ്രതികൂല സമയം തരണം ചെയ്യുവാനും പ്രയോജനപ്പെടും.
മേടം രാശി: (അശ്വതി, ഭരണി, കാർത്തിക ആദ്യ 1/4 ഭാഗം)
പുതിയ ഒരു ആത്മബന്ധം ഉടലെടുക്കും. കുടുംബത്തിൽ പൊതുവിൽ സമാധാന അന്തരീക്ഷം ഉണ്ടാകും. തൊഴിൽ സ്ഥലങ്ങളിൽ വിചാരിക്കാത്ത പ്രശ്നങ്ങൾ രൂക്ഷമാകുകയും അതിനെത്തുടർന്ന് ഉണ്ടായേക്കാവുന്ന ചർച്ചകൾക്ക് പൂർണ്ണത കൈവരാത്ത അവസ്ഥ നേരിട്ടേക്കാം. എന്നാൽ പദ്ധതി ആസൂത്രണങ്ങളിൽ വിജയിച്ചതിനാൽ അധികൃതരുടെ പ്രീതി നേടും. കോടതി വ്യവഹാരങ്ങളിൽ വിജയം ഉണ്ടാകാൻ സാധ്യത.
ഇടവം രാശി: (കാർത്തിക അവസാന 3/4 ഭാഗം, രോഹിണി, മകയിര്യം ആദ്യ 1/2 ഭാഗം
അനാവശ്യ ചിലവുകൾ നിയന്ത്രിക്കേണ്ടി വന്നേക്കും. വളരെക്കാലമായി ഉള്ള രോഗങ്ങൾക്ക് ശമനം ഉണ്ടാകാൻ സാധ്യതയുണ്ട്. ഗൃഹോപകരണങ്ങൾ മാറ്റി വാങ്ങുവാൻ അവസരം വന്നു ചേർന്നേക്കും. തൊഴിൽ വിജയം, ധനലാഭം, സൽസുഹൃത്തുക്കളുടെ സാമീപ്യം ഒക്കെയും വന്നു ചേരുന്ന നല്ല ഒരു വാരം ആയിരിക്കും. എന്നിരുന്നാലും വാക്കുകൾ സൂക്ഷിച്ചു ഉപയോഗിക്കുവാൻ ശ്രദ്ധിക്കുക.
മിഥുനം രാശി: (മകയിര്യം അവസാന 1/2 ഭാഗം, തിരുവാതിര, പുണർതം ആദ്യ 3/4 ഭാഗം)
കുടുംബസമേതം മംഗള കർമ്മങ്ങളിൽ പങ്കെടുക്കാൻ യോഗം കാണുന്നു. പുതിയകരാർ ജോലികളിൽ ഒപ്പു വയ്ക്കുവാൻ അവസരം ചേരും. ആടയാഭരണയലങ്കാര വസ്തുക്കളുടെ വർദ്ധനവ് ഉണ്ടായേക്കാം. അനാവശ്യ കൂട്ടുകെട്ടുകളിൽ ധനനഷ്ടം ഉണ്ടാകാതെ ശ്രദ്ധിക്കുക. ഭക്ഷണ സുഖം ഉണ്ടാകും. നിനച്ചിരിക്കാത്ത സമ്മാനങ്ങൾ ലഭിക്കാൻ സാധ്യത ഉണ്ട്.
കർക്കിടകം രാശി: (പുണർതം അവസാന 1/4 ഭാഗം, പൂയം, ആയില്യം)
നഷ്ടപെട്ട സ്ഥാനമാനങ്ങൾ തിരികെ ലഭിക്കും. വ്യാപാര വിപണന രംഗങ്ങളിൽ പുരോഗതിയും സാമ്പത്തിക നേട്ടവും ഉണ്ടാകും. പുണ്യ പാവന ദേശങ്ങളിൽ തീർത്ഥങ്ങളിൽ മഹാക്ഷേത്രങ്ങളിൽ ഒക്കെ സന്ദർശനം നടത്തുവാൻ യോഗം ഉള്ള വാരം ആണ്. കുടുംബത്തിൽ സ്വസ്ഥതയും സമാധാനവും ദാമ്പത്യ സൗഖ്യവും ഉണ്ടാകാൻ സാധ്യത.
ചിങ്ങം രാശി: (മകം, പൂരം, ഉത്രം ആദ്യ 1/4 ഭാഗം)
ഉദരരോഗഗ്രസ്തർ ജാഗ്രത പുലർത്തേണ്ട കാലമാണ്. തൊഴിൽ വിജയം, സാമ്പത്തിക ലാഭം, കീർത്തി ഒക്കെയും ഉണ്ടായേക്കും. മംഗള കർമ്മങ്ങളിൽ പങ്കെടുക്കുവാനും, അതിനു നേതൃത്വം നൽകുവാനും യോഗം ഉണ്ട്. ദമ്പതികളിൽ ഐക്യം അനുഭവപ്പെടും. ഈശ്വരാധീനം വർദ്ധിക്കുകയും മനസ്സിൽ വിചാരിക്കുന്ന കാര്യങ്ങൾ ഞൊടിയിടയിൽ നടക്കുകയും ചെയുന്ന കാലവും ആണ്. ആയതിനാൽ മനസ്സിൽ ഉചിതമായ കാര്യങ്ങൾ മാത്രം വിചാരിക്കുക.
കന്നി രാശി: (ഉത്രം അവസാന 3/4 ഭാഗം, അത്തം, ചിത്തിര ആദ്യ 1/2 ഭാഗം)
സാമ്പത്തികമായ ജാഗ്രത പുലർത്തേണ്ട കാലം ആണ്. പണം, ചെക്ക് മുതലായവ കൈകാര്യം ചെയ്യുമ്പോൾ ചതിപറ്റാതെയിരിക്കുവാൻ വളരെ ശ്രദ്ധിക്കുക. വാദി പ്രതിയാക്കുന്ന സമയം ആണ്. കോടതി വ്യവഹാരങ്ങളിൽ പരാജയം ജയിൽ ശിക്ഷ ഒക്കെയും ഉണ്ടായേക്കാം. ബന്ധു ജനങ്ങൾ ആയി അഭിപ്രായ വ്യത്യാസവും കലഹവും ഉണ്ടായേക്കാം. എന്നിരുന്നാലും, സർക്കാർ ജോലി ചെയ്യുന്നവർക്ക് അനുകൂല കാലം ആയിരിക്കും.
തുലാം രാശി: (ചിത്തിര അവസാന 1/2 ഭാഗം, ചോതി, വിശാഖും ആദ്യ 3/4 ഭാഗം)
വാഹനഭാഗ്യം, ധനനേട്ടം ഒക്കെയും ഉണ്ടായേക്കാം. കുടുംബത്തിൽ സമാധാന അന്തരീക്ഷം സംജാതമാകും. സർക്കാർ സംബന്ധമായ ദോഷഫലങ്ങൾ കേസുവഴക്കുകൾ ഒക്കെയും ഉണ്ടായേക്കാം. മത്സര പരീക്ഷകളിൽ ശോഭിക്കാൻ സാധ്യത. ആധ്യാത്മിക ചിന്തകൾ വർദ്ധിക്കും. ചില രോഗങ്ങൾ മൂർച്ഛിക്കാൻ സാധ്യത. ദൈവാധീനം ഉണ്ടാകുന്ന സമയം ആയതിനാൽ പല പ്രശ്നങ്ങളിൽ നിന്നും തലനാരിഴക്ക് രക്ഷപെടും. അനാവശ്യ ബന്ധങ്ങൾ അപമാനത്തിനു ഇടവരുത്തും.
വൃശ്ചികം രാശി: (വിശാഖം അവസാന 1/4 ഭാഗം, അനിഴം, തൃക്കേട്ട)
ഏറ്റെടുത്ത പ്രവർത്തികൾ ഉത്തരവാദിത്തത്തോടെ വിജയത്തിൽ എത്തിക്കാൻ സാധിക്കുന്ന വാരമാണ്. തൃപ്തികരമായ ആരോഗ്യനില ആയിരിക്കും. സാമ്പത്തിക കാര്യങ്ങളിൽ ഉണ്ടായിരുന്ന അനിശ്ചിത്വതം മാറി സാമ്പത്തിക ലാഭം ഉണ്ടാകും. പ്രേമകാര്യങ്ങളിൽ വിജയം നേടും. ബന്ധുജനങ്ങളായി അഭിപ്രായ വ്യത്യാസം ഉണ്ടാകാൻ സാധ്യത ഉണ്ട്. ശത്രുക്കളിൽ നിന്നും ഉപദ്രവം വർദ്ധിക്കുന്നതായി അനുഭവപ്പെട്ടേക്കാം.
ധനു രാശി: (മൂലം, പൂരാടം, ഉത്രാടം ആദ്യ 1/4 ഭാഗം)
ദമ്പതികൾ ഐക്യവും ദാമ്പത്യത്തിൽ സമാധാനവും ഉണ്ടാകും. എവിടെയും മാന്യത, മനസുഖം ഒക്കെയും അനുഭവപ്പെടും. വാഹനങ്ങൾ ഉപയോഗിക്കുന്നവർ വളരെയധികം ശ്രദ്ധിക്കുക. ഉത്തരവാദിത്തങ്ങൾ വർദ്ധിക്കുന്ന വിഭാഗത്തിലേക്ക് സ്ഥാനക്കയറ്റം അഥവാ സ്ഥാനമാറ്റം ഉണ്ടായേക്കാം. വിശേഷപ്പെട്ട സന്തോഷ മുഹൂർത്തങ്ങളിൽ പങ്കുചേരുവാൻ അവസരം ഉണ്ടായേക്കാം. ശത്രുഹാനി, മറ്റു ഭാഗ്യാനുഭവങ്ങൾ ഒക്കെയും അനുഭവത്തിൽ വന്നേക്കാം.
മകരം രാശി: (ഉത്രാടം അവസാന 3/4 ഭാഗം, തിരുവോണം, ആദ്യ അവിട്ടം 1/2 ഭാഗം)
ചെയ്യുന്ന പ്രവർത്തികൾ ലാഭത്തിൽ ആകുകയും സാമ്പത്തിക ലാഭം ഉണ്ടാകാൻ യോഗം ഉണ്ടെങ്കിലും ക്ഷമാശീലം ഗുണം ചെയുന്ന വാരമായിരിക്കും. ബന്ധുജനങ്ങൾ ആയി അഭിപ്രായ വ്യത്യാസം ഉണ്ടാകാതെ ശ്രദ്ധിക്കുക. ദമ്പതികൾ ഐക്യത കുറവ് വന്നേക്കാം. കുടുംബ ജീവിതത്തിൽ സ്വസ്ഥത കുറയുന്നതായി അനുഭവപ്പെടും. ജലസംബന്ധിയായ തൊഴിൽ ചെയ്യുന്നവർ അപകടങ്ങൾ ഉണ്ടാകാതെ ജാഗ്രത പുലർത്തുക. വാത – ഉദരരോഗങ്ങൾ ഉള്ളവർ ആരോഗ്യം ശ്രദ്ധിക്കുക.
കുംഭം രാശി: (അവിട്ടം അവസാന 1/2 ഭാഗം, ചതയം, പൂരൂരുട്ടാതി ആദ്യ 3/4 ഭാഗം)
വരവ് ചിലവുകൾ തുല്യമായി അനുഭവപ്പെടും. വിചാരിച്ച രീതിയിൽ അംഗീകാരവും ആനുകൂല്യങ്ങളും ലഭിക്കാത്തതിനാൽ ചെയ്യുന്ന ഉദ്യോഗം ഉപേക്ഷിക്കുവാൻ സാധ്യത ഉണ്ട്. മനശാന്തി കുറയുന്ന കാലം ആണ്. ദുസ്വപ്നങ്ങൾ കണ്ടേക്കാം. സൽസുഹൃത്തുക്കൾ ഉണ്ടാകുകയും ഭക്ഷണസുഖം ലഭിക്കുകയും ചെയ്യും. യാത്രാക്ലേശം കുറയുകയും കുടുംബം വിട്ടു മാറി നിൽക്കേണ്ട അവസ്ഥ ഉണ്ടാകുകയും ചെയ്തേക്കാം.
മീനം രാശി: (പൂരൂരുട്ടാതി അവസാന 1/4 ഭാഗം, ഉതൃട്ടാതി, രേവതി)
കോടതി സംബന്ധമായ വ്യവഹാരങ്ങളിൽ വിജയം ഉണ്ടാകും. സമൂഹത്തിലെ ഉന്നതരുമായി സൗഹൃദബന്ധത്തിൽ ഏർപ്പെടും. സ്ത്രീകളുമായി അടുത്തിടപഴകുവാൻ അവസരം ലഭിക്കും. ഉന്നത സ്ഥാനലബ്ധിയും ധനലാഭവും പ്രതീക്ഷിക്കാം. എന്നിരുന്നാലും ഭക്ഷ്യ വിഷ ബാധ ഏൽക്കാതെ സൂക്ഷിക്കുക. തൊഴിൽ ഇടങ്ങളിൽ അഭിപ്രായ വ്യത്യാസം ഉണ്ടാകാതെ തത്വത്തിൽ കൈകാര്യം ചെയ്യുക.നേത്ര രോഗങ്ങൾ ഉള്ളവർ സൂക്ഷിക്കുക.
ജയറാണി ഈ വി .
WhatsApp No : 9746812212
(പാരമ്പര്യ ജ്യോതിഷ കുടുംബത്തിലെ അംഗം. ഇരുപതിലേറെ വർഷമായി ജ്യോതിഷം സംഖ്യാശാസ്ത്രം വാസ്തു ആചാര അനുഷ്ഠാന വിഷയങ്ങൾ കൈകാര്യം ചെയ്യുന്നു)