ന്യൂഡൽഹി: രാജ്യത്തെ വികസനം കാംക്ഷിക്കുന്ന ബ്ലോക്കുകൾക്കായി ‘സങ്കൽപ് സപ്താഹ്’ എന്ന പേരിൽ ഒരു ആഴ്ച നീണ്ടുനിൽക്കുന്ന സവിശേഷ പരിപാടിയ്ക്ക് പ്രധാനമന്ത്രി നരേന്ദ്രമോദി തുടക്കം കുറിച്ചിരിക്കുകയാണ്. ഇന്ന് രാവിലെ 10 മണിക്ക് ഭാരത് മണ്ഡപത്തിൽ നടന്ന ചടങ്ങിലാണ് ‘സങ്കൽപ് സപ്താഹ’് പ്രധാനമന്ത്രി ഉദ്ഘാടനം ചെയ്തത്.
എന്താണ് ‘സങ്കൽപ് സപ്താഹ്’?
ആസ്പിറേഷനൽ ബ്ലോക്ക്സ് പ്രോഗ്രാമിന്റെ (വികസനം കാംക്ഷിക്കുന്ന ബ്ലോക്ക് പദ്ധതി-എ.ബി.പി) ഫലപ്രദമായ നടത്തിപ്പുമായി ബന്ധപ്പെട്ടതാണ് ‘സങ്കൽപ് സപ്താഹ്. രാജ്യവ്യാപകമായ ഈ പരിപാടിയ്ക്ക് 2023 ജനുവരി 7-ന് പ്രധാനമന്ത്രി സമാരംഭം കുറിച്ചിരുന്നു. പൗരന്മാരുടെ ജീവിത നിലവാരം മെച്ചപ്പെടുത്തുന്നതിനായി ബ്ലോക്ക് തലത്തിൽ ഭരണനിർവഹണം മെച്ചപ്പെടുത്താനാണ് ‘സങ്കൽപ് സപ്താഹ്’ലക്ഷ്യമിടുന്നത്. രാജ്യത്തെ 329 ജില്ലകളിലെ 500 വികസനം കാംക്ഷിക്കുന്ന ബ്ലോക്കുകളിലാണ് പദ്ധതി നടപ്പാക്കുന്നത്.
ഈ പദ്ധതി നടപ്പിലാക്കുന്നതിനും ഫലപ്രദമായ ബ്ലോക്ക് വികസന തന്ത്രം തയാറാക്കുന്നതിനുമായി രാജ്യത്തുടനീളം ഗ്രാമ-ബ്ലോക്ക് തലങ്ങളിൽ ചിന്തൻ ശിബിരങ്ങൾ കേന്ദ്രസർക്കാർ സംഘടിപ്പിച്ചിരുന്നു. പ്രധാനമന്ത്രിയുടെ ഓഫീസിന്റെ ഔദ്യോഗിക പ്രസ്താവന പ്രകാരം ഈ ചിന്തൻ ശിബിരങ്ങളുടെ ഒരു പരിസമാപ്തിയാണ് ‘സങ്കൽപ് സപ്താഹ്’. അതായത് ഈ ചിന്തൻ ശിബിരങ്ങളെ പരിപൂർണ്ണതയിൽ എത്തിക്കുന്നതാണ് ‘സങ്കൽപ് സപ്താഹ്’.
വികസനം കാംക്ഷിക്കുന്ന 500 ബ്ലോക്കുകളിലും ‘സങ്കൽപ് സപ്താഹ്’ ആചരിക്കും. സങ്കൽപ് സപ്താഹ്’ തുടങ്ങുന്ന 2023 ഒക്ടോബർ 3 മുതൽ അവസാനിക്കുന്ന ഒക്ടോബർ 9 വരെയുള്ള ഓരോ ദിവസവും, വികസനം കാംക്ഷിക്കുന്ന ബ്ലോക്കുകൾ പ്രവർത്തിക്കുന്ന പ്രത്യേക വികസന ആശയത്തിനായി സമർപ്പിക്കും.
‘സമ്പൂർണ ആരോഗ്യം, പോഷണമുള്ള കുടുംബം, ശുചിത്വം, കൃഷി, ബോധവൽക്കരണം, സമൃദ്ധി ദിവസ്’ എന്നിവ ആദ്യ ആറ് ദിവസങ്ങളിലെ ആശയങ്ങളിൽ ഉൾപ്പെടും. ഏറ്റവും അവസാന ദിവസം, അതായത് 2023 ഒക്ടോബർ 9-ന്, ആ ‘സങ്കൽപ് സപ്താഹ്-സമവേശ് സമരോഹ് ‘എന്ന പേരിൽ ആ ആഴ്ച മുഴുവൻ നടന്ന പ്രവർത്തനങ്ങളുടെ ആഘോഷമായിരിക്കും നടക്കുക.
രാജ്യത്തങ്ങോളമിങ്ങോളമുള്ള മൂവായിരത്തിൽപരം പഞ്ചായത്ത്, ബ്ലോക്ക് തല ജനപ്രതിനിധികളും അധികാരികളുമാണ് സങ്കൽപ് സപ്താഹിൽ പങ്കെടുക്കുന്നത്. കൂടാതെ, ബ്ലോക്ക്, പഞ്ചായത്ത് തല ഭാരവാഹികൾ, കർഷകർ, സമൂഹത്തിന്റെ മറ്റ് തുറകളിലുള്ളവർ എന്നിവരുൾപ്പെടെ രണ്ട് ലക്ഷത്തോളം പേർ പരിപാടിയിൽ വെർച്ച്വലായും പങ്കുചേരുന്നുണ്ട്.
