വാഷിംഗ്ടൺ: ന്യൂജേഴ്സിയിലെ റോബിൻസ്വില്ലാ നഗരത്തിലുള്ള അക്ഷർധാം ക്ഷേത്രത്തിന്റെ ഉദ്ഘാടനത്തിന് ആശംസകൾ നേർന്ന് പ്രധാനന്ത്രി നരേന്ദ്രമോദിയും ബ്രിട്ടീഷ് പ്രധാനമന്ത്രി ഋഷി സുനകും. നിലവിൽ ഇന്ത്യയ്ക്ക് പുറത്തുള്ള ഏറ്റവും വലിയ ക്ഷേത്രമെന്ന നേട്ടവും ഇനി ന്യൂജേഴ്സി അക്ഷർധാം ക്ഷേത്രത്തിന് സ്വന്തമാകും.
‘ ലോകമെമ്പാടുമുള്ള ഭക്തർക്ക് ആത്മീയ ഉന്നതിക്കുള്ള മികച്ച അവസരമാണ് ഈ ക്ഷേത്രം നൽകുന്നത്-പ്രധാനമന്ത്രി റോബിൻസ് വില്ലയിലെ ബി.എ.പി.എസ് സ്വാമിനാരായൺ അക്ഷർധാമിന് എഴുതിയ കത്തിൽ പറഞ്ഞു. ന്യൂജേഴ്സിയിലെ അക്ഷർധാം മന്ദിരത്തിൽ ഇന്ത്യൻ വാസ്തുവിദ്യയും ഭാരതത്തിന്റെ സംസ്കാരവും ധാർമ്മികതയും പ്രകടമാകുന്നുണ്ടെന്നും മന്ദിരത്തിന്റെ ഉദ്ഘാടനത്തിൽ പങ്കുച്ചേരുന്ന എല്ലാവർക്കും ആശംസകൾ നേരുന്നെന്നും പ്രധാനമന്ത്രി കത്തിൽ കുറിച്ചു.
‘ ഇത് ഒരു ആരാധനാലയം മാത്രമല്ല, ഇന്ത്യയുടെ മൂല്യങ്ങളും സംസ്കാരവും ലോകത്തിനു മുന്നിൽ തുറന്നു കാണിക്കുന്ന ചരിത്രപ്രസിദ്ധമായ മന്ദിരമാണ്’-ബ്രിട്ടീഷ് പ്രധാനമന്ത്രി പറഞ്ഞു. ഇന്ത്യയുടെയും യുഎസിന്റെയും ബന്ധം ദൃഢമാക്കുന്നതിലും ജനങ്ങൾക്കിടയിൽ സ്നേഹവും ഐക്യവും വളർത്തിയെടുക്കുന്നതിനും അക്ഷർധാം ക്ഷേത്രം പ്രധാന പങ്കുവഹിക്കുമെന്നും അദ്ദേഹം കൂട്ടിച്ചേർത്തു.
ന്യൂജേഴ്സിയിലെ അക്ഷർധാം ക്ഷേത്രം മൂന്നാമത്തെ ആഗോള സമുച്ചയമാണ്. ചരിത്ര പ്രധാന്യമുള്ള ഈ ക്ഷേത്രത്തിന്റെ ഉദ്ഘാടനം ഈ മാസം എട്ടാം തിയതി നടക്കും.