പുതിയ പ്രീമിയം ലാപ്ടോപ്പ് വിഭാഗം അവതരിപ്പിച്ച് ഗൂഗിൾ. ക്രോംബുക്ക് പ്ലസ് എന്ന പേരിൽ ഏസർ, അസ്യൂസ്, എച്ച്പി, ലെനോവോ എന്നീ കമ്പനികളുമായി സഹകരിച്ചാണ് പുതിയ ലാപ്ടോപ്പ് വിഭാഗം ഗൂഗിൾ അവതരിപ്പിച്ചിരിക്കുന്നത്. സാധാരണ ക്രോംബുക്കിനെ അപേക്ഷിച്ച് പ്രവർത്തന ക്ഷമത വർദ്ധിപ്പിക്കുന്ന തരത്തിലുള്ള വേഗമേറിയ പ്രൊസസറുകളും ഇരട്ടി മെമ്മറിയും സ്റ്റോറേജും പുതിയ ക്രോംബുക്ക് പ്ലസിനുണ്ടാകും. വേഗമേറിയ ഹാർഡ് വെയറിന് പുറമെ ഒരു കൂട്ടം എഐ ഫീച്ചറുകളും ക്രോംബുക്ക് പ്ലസിൽ ലഭിക്കും.
അംഗീകൃത ഉപകരണങ്ങൾക്ക് മാത്രമായി നിരവധി സോഫ്റ്റ് വെയർ ഫീച്ചറുകളാണ് ക്രോം ബുക്ക്പ്ലസിൽ അവതരിപ്പിച്ചിരിക്കുന്നത്. വീഡിയോ കോൺഫറൻസിംഗിനായി പ്രത്യേക കൺട്രോൾ പാനൽ ഇതിൽ സജ്ജമാക്കിയിട്ടുണ്ട്. നോയ്സ് കാൻസലേഷൻ, ബാക്ക്ഗ്രൗണ്ട് ബ്ലർ, ലൈവ് കാപ്ഷൻ, ബ്രൈറ്റ്നെസ് അഡ്ജസ്റ്റ്മെന്റ് എന്നിങ്ങനെയുള്ള എഐ ഫീച്ചറുകളും ലഭിക്കും. മെറ്റീരിയൽ യു, ഡൈനാമിക് വാൾപേപ്പർ, സ്ക്രീൻ സേവറുകൾ എന്നിങ്ങനെയുള്ള ആൻഡ്രോയിഡ് ഫീച്ചറുകളും ഇതിൽ ഉപയോഗിക്കാനാകും.
ഓട്ടോമാറ്റിക് ഫയൽ സിങ്ക് സംവിധാനത്തിലൂടെ ഓഫ്ലൈൻ മുഖേനയും ഡ്രൈവിലെ ഫയലുകളിലേക്ക് എത്താനാകും. ഗൂഗിൾ ഫോട്ടോസിലെ മാജിക് ഇറേസർ, പോർട്രെയ്റ്റ് ബ്ലർ എന്നീ സൗകര്യങ്ങളും ഇതിലൂടെ ലഭ്യമാണ്. കൂടാതെ ക്രോംബുക്ക് ഉപയോക്താക്കൾക്ക് മൂന്ന് മാസം സൗജന്യമായി അഡോബി ഫോട്ടോഷോപ്പ്, എക്സ്പ്രസ് എന്നിവയും ഉപയോഗിക്കാനാകും. പഴയ ചില ക്രോംബുക്കുകളിൽ ഔഎസ് അപ്ഡേറ്റിലൂടെ ക്രോം പ്ലസ് ലഭിക്കുന്നതായിരിക്കും. ഒക്ടോബർ 17 മുതലാണ് അപ്ഡേറ്റ് ലഭിക്കുക.