ഐഫോൺ 15 സീരീസുകളുടെ ബാറ്ററി വലിയ രീതിയിൽ ചൂടാവാൻ തുടങ്ങിയതോടെ നിരവധി വിമർശനങ്ങളാണ് അടുത്തിടെ കമ്പനി ഏറ്റുവാങ്ങിയത്. അതിനിടെയാണ് ഐഫോൺ ഉപയോക്താക്കളെ ഞെട്ടിപ്പിച്ചുകൊണ്ട് ഫോണിൽ നിന്നും ബസ്സർ ശബ്ദം പുറത്തുവന്നത്. എന്നാൽ ഇതിന് കമ്പനിയെ കുറ്റം പറയേണ്ടതില്ല. കേന്ദ്ര സർക്കാരിന്റെ ടെലികമ്മ്യൂണിക്കേഷൻ സംവിധാനത്തിൽ നിന്നും ലഭിച്ച സന്ദേശമാണിത്.
ദേശീയ ദുരന്ത നിവാരണ അതോറിറ്റിയുടെ സാമ്പിൾ ടെസ്റ്റ് സന്ദേശമാണ് ഉപയോക്താക്കൾക്ക് ലഭിച്ചത്. രാവിലെ 11:30-ഓടെയാണ് ഐഫോൺ ഉപയോക്താക്കൾക്ക് ശബ്ദത്തോടു കൂടിയ സന്ദേശം ലഭിച്ചത്. ഭൂകമ്പം, സുനാമി, പ്രളയം തുടങ്ങിയ പ്രകൃതി ദുരന്തങ്ങളെ കുറിച്ചുള്ള മുന്നറിയിപ്പുകൾ നൽകാനാണ് കേന്ദ്ര സർക്കാർ ഈ സംവിധാനം ഏർപ്പെടുത്തിയിരിക്കുന്നത്. വരും മാസങ്ങളിൽ സംവിധാനം വിപുലീകരിക്കാനാണ് കേന്ദ്രസർക്കാരിന്റെയും ദേശീയ ദുരന്ത നിവാരണ അതോറിറ്റിയുടെയും തീരുമാനം. ഇതോടെ രാജ്യത്തിലെ ജനങ്ങൾക്ക് ഫോൺ വഴി പ്രകൃതി ദുരന്തങ്ങളെ കുറിച്ച് അറിയിപ്പ് നൽകുകയും ജാഗ്രത പുലർത്താൻ നിർദ്ദേശിക്കുകയും ചെയ്യുന്നു. ഇതിനു മുമ്പ് കേന്ദ്ര സർക്കാർ ഇത്തരം അലർട്ട് സംവിധാനം ആൻഡ്രോയിഡ് ഫോണുകളിലും പരീക്ഷിച്ചിരുന്നു.
