ഗൂഗിൾ ക്രോമിൽ ഗുരുതര സുരക്ഷപ്രശ്നങ്ങളെന്ന് മുന്നറിയിപ്പ്. കമ്പ്യൂട്ടർ എമർജൻസി റെസ്പോൺസ് ടീം അഥവാ സിഇആർടിയാണ് സുരക്ഷാ പ്രശ്നങ്ങൾ സംബന്ധിച്ച് മുന്നറിയിപ്പ് നൽകിയിരിക്കുന്നത്. കമ്പ്യൂട്ടർ സംവിധാനങ്ങൾക്ക് നേരെ സൈബർ ആക്രമണം നടത്താൻ സാധിക്കത്തക്ക വിധത്തിലുള്ള സുരക്ഷാ വീഴ്ചകളാണ് ക്രോമിലുള്ളതെന്നാണ് മുന്നറിയിപ്പ്.
ഇന്നലെയാണ് സിഇആർടി ഇത് സംബന്ധിച്ച മുന്നറിയിപ്പ് പുറത്തിറക്കുന്നത്. ബ്രൗസറിലെ സുരക്ഷാ വീഴ്ചകൾ മുതലെടുത്ത് കമ്പ്യൂട്ടർ സംവിധാനത്തിനെതിരെ ഡിനയൽ ഓഫ് സർവീസ് ആക്രമണം നടത്താൻ ഹാക്കർമാർക്ക് സാധിച്ചേക്കുമെന്നാണ് മുന്നറിയിപ്പിലുള്ളത്. ഇതിൽ നിന്നും സുരക്ഷ ഉറപ്പു വരുത്തുന്നതിന് ഉപയോക്താക്കൾ പെട്ടെന്ന് തന്നെ അപ്ഡേറ്റ് ചെയ്യണമെന്നും പറയുന്നു.
ഗൂഗിൾ ക്രോമിന്റെ 118.0.5993.70 അല്ലെങ്കിൽ 118.0.5993.71 എന്നീ വിൻഡോസിന് മുമ്പുള്ള വേർഷനുകളിലാണ് സുരക്ഷാ വീഴ്ച കണ്ടെത്തിയിരിക്കുന്നത്. മാക്ക്, ലിനക്സ് പതിപ്പുകളുടെ 118.0.5993.70 വേർഷന് മുമ്പുള്ള വേർഷനിലും ഈ പ്രശ്നം കണ്ടെത്തിയിട്ടുണ്ട്. സൈബർ സുരക്ഷയുമായി ബന്ധപ്പെട്ട വിഷയങ്ങൾ കൈകാര്യം ചെയ്യുന്നതിന് വേണ്ടി ഐടി മന്ത്രാലയത്തിന് കീഴിൽ പ്രവർത്തിക്കുന്ന സ്ഥാപനമാണ് കമ്പ്യൂട്ടർ എമർജൻസി റെസ്പോൺസ് ടീം.